విజయ్ హజారే ట్రోఫీలో భాగంగా గోవాతో జరిగిన మ్యాచ్‌లో ముంబై బ్యాటర్ సర్ఫరాజ్ ఖాన్ ఆకాశమే హద్దుగా చెలరేగిపోయాడు. కేవలం 75 బంతుల్లోనే 9 ఫోర్లు, 14 సిక్సర్ల సాయంతో 157 పరుగులు చేసి సెలెక్టర్లకు గట్టి సమాధానమిచ్చాడు. అతనికి తోడుగా తమ్ముడు ముషీర్ ఖాన్ 66 పరుగులతో రాణించడంతో ముంబై నిర్ణీత ఓవర్లలో 8 వికెట్ల నష్టానికి 444 పరుగుల భారీ స్కోరు సాధించింది.

మరోవైపు గోవా బౌలర్ అర్జున్ టెండూల్కర్‌కు ఈ మ్యాచ్ చేదు జ్ఞాపకాన్ని మిగిల్చింది. ముంబై బ్యాటర్ల ధాటికి అర్జున్ 8 ఓవర్లలోనే ఏకంగా 78 పరుగులు సమర్పించుకుని ఒక్క వికెట్ కూడా తీయలేకపోయాడు. భారీ లక్ష్యంతో బరిలోకి దిగిన గోవా తరపున అర్జున్ టెండూల్కర్ ఓపెనర్‌గా బ్యాటింగ్‌కు వచ్చి పోరాడుతున్నాడు. యశస్వి జైస్వాల్ 46 పరుగులతో మెరవగా, సర్ఫరాజ్ వీరవిహారం ఈ మ్యాచ్‌కే హైలైట్‌గా నిలిచింది.