பனிக்காலத்தில் குளிக்கும் முறையில் நாம் செய்யும் சில தவறுகள் இதயம் மற்றும் இரத்த அழுத்தம் சார்ந்த தீவிர பாதிப்புகளை ஏற்படுத்தும் என்று மருத்துவர்கள் எச்சரிக்கின்றனர். அதிகாலையில் வெறும் வயிற்றில் குளிப்பது அல்லது நேரடியாக குளிர்ந்த நீரை தலையில் ஊற்றுவது இரத்த நாளங்களை சுருக்கி மாரடைப்பு மற்றும் பக்கவாதம் ஏற்படும் அபாயத்தை அதிகரிக்கிறது. எனவே எப்போதும் மிதமான சுடுநீரைப் பயன்படுத்துவது பாதுகாப்பானது என்று நிபுணர்கள் பரிந்துரைக்கின்றனர்.

அதிக நேரம் குளிப்பது சருமத்தின் ஈரப்பதத்தை குறைத்து வறட்சி மற்றும் அலர்ஜியை உண்டாக்குகிறது. குளித்த உடனே போதிய வெப்ப ஆடைகள் அணியாமல் வெளியே செல்வது நிமோனியா மற்றும் காய்ச்சலுக்கு வழிவகுக்கும். உடல்நிலை சரியில்லாத போது குளிப்பது உடல் நலம் தேறுவதை தாமதப்படுத்தும் என்பதால், குளிர்காலத்தில் குளியல் விஷயத்தில் மிகுந்த எச்சரிக்கை தேவை.