బంగ్లాదేశ్‌లో మహమ్మద్ యూనస్ నేతృత్వంలోని మధ్యంతర ప్రభుత్వ హయాంలో హిందువులపై జరుగుతున్న దాడులు ప్రపంచవ్యాప్తంగా విమర్శలకు దారితీస్తున్నాయి. హిందువుల ఇళ్లకు నిప్పు పెట్టడం, దీపు చంద్ర దాస్ వంటి వారిని మూకదాడిలో దారుణంగా చంపి తగలబెట్టడం వంటి ఘటనలపై భారత్ తీవ్ర అభ్యంతరం వ్యక్తం చేస్తోంది. అయితే తన వైఫల్యాలను కప్పిపుచ్చుకోవడానికి బంగ్లాదేశ్ ఇప్పుడు ఎదురుదాడికి దిగుతూ, భారత్‌లోని మైనారిటీల పరిస్థితిపై అనవసరమైన వ్యాఖ్యలు చేస్తూ ప్రపంచం ముందు అభాసుపాలవుతోంది.

భారత్‌లో మైనారిటీలు, క్రైస్తవులపై హింస జరుగుతోందంటూ బంగ్లాదేశ్ విదేశీ వ్యవహారాల ప్రతినిధి ఎస్.ఎం. మెహబూబుల్ ఆలం వింత వాదనలు తెరపైకి తెచ్చారు. క్రిస్మస్ పండుగ సమయంలో జరిగిన కొన్ని సంఘటనలను ప్రస్తావిస్తూ నిష్పక్షపాత విచారణ జరపాలని భారత్‌కు సూచించడం చర్చనీయాంశంగా మారింది. సొంత దేశంలో హిందువుల ప్రాణాలను కాపాడటంలో ఘోరంగా విఫలమైన బంగ్లాదేశ్ ప్రభుత్వం, అంతర్జాతీయ సమాజం దృష్టిని మళ్లించేందుకే ఇటువంటి ఆరోపణలు చేస్తోందని విశ్లేషకులు అభిప్రాయపడుతున్నారు.