ఉత్తరప్రదేశ్‌లోని రాయ్‌బరేలి మరియు అమేథీ జిల్లాల్లో రేషమ్ బానో మరియు అభిషేక్ సోంకర్ల ప్రేమకథ ఇప్పుడు హాట్ టాపిక్‌గా మారింది. గత మూడేళ్లుగా ప్రేమించుకుంటున్న ఈ జంట, మతపరమైన అడ్డంకులను పక్కన పెట్టి పెళ్లితో ఒక్కటవ్వాలని నిర్ణయించుకున్నారు. రాయ్‌బరేలిలోని ఒక ఆలయంలో హిందూ సంప్రదాయం ప్రకారం ఏడడుగులు వేసి, ఒకరినొకరు జీవిత భాగస్వాములుగా అంగీకరించారు. పరస్పర అంగీకారంతో జరిగిన ఈ వివాహం స్థానికంగా అందరి దృష్టిని ఆకర్షించింది.

పెళ్లి అనంతరం రేషమ్ బానో మాట్లాడుతూ, తాను ఎవరి ఒత్తిడి లేకుండా స్వచ్ఛందంగా హిందూ మతాన్ని స్వీకరించి అభిషేక్‌ను వివాహం చేసుకున్నట్లు స్పష్టం చేశారు. కేవలం తన ప్రేమపై ఉన్న నమ్మకంతోనే ఈ నిర్ణయం తీసుకున్నానని ఆమె తెలిపారు. సామాజిక కట్టుబాట్ల కంటే మనసుల కలయిక ముఖ్యమని నిరూపించిన ఈ జంట ప్రస్తుతం రాయ్‌బరేలి ప్రాంతంలో చర్చనీయాంశంగా మారింది.