మహారాష్ట్రలోని సతారా జిల్లాకు చెందిన రాంభావు బోడ్కే అనే ఎనభై ఏళ్ల వృద్ధుడు గత ముప్పై ఒక్క ఏళ్లుగా ప్రతిరోజూ పావు కిలో రాళ్లను తింటూ అందరినీ ఆశ్చర్యానికి గురిచేస్తున్నారు. 1989లో విపరీతమైన కడుపునొప్పితో బాధపడుతున్న సమయంలో, ఒక వృద్ధురాలు ఇచ్చిన సలహాతో ఆయన రాళ్లు తినడం ప్రారంభించారు. ఆశ్చర్యకరంగా ఆ అలవాటుతోనే తన నొప్పి తగ్గిందని ఆయన నమ్ముతారు. ఊరి జనం ఆయనను ప్రేమగా ‘రాళ్ల బాబా’ అని పిలుచుకుంటారు.

ఇటీవల అనారోగ్యంతో ఆసుపత్రిలో చేరిన ఆయనకు సీటీ స్కాన్ చేయగా కడుపులో కుప్పలు తెప్పలుగా రాళ్లు బయటపడటంతో వైద్యులు నివ్వెరపోయారు. ఇన్ని రాళ్లు తింటున్నప్పటికీ ఎనభై ఏళ్ల వయసులో ఆయన ప్రాణాలతో ఉండటం ఒక అద్భుతమని వైద్యులు పేర్కొంటున్నారు. వైద్యులు ఆయనను ఈ ప్రమాదకరమైన అలవాటు మానుకోమని హెచ్చరించినప్పటికీ, ఆ వింత అలవాటునే తన ఆరోగ్య రహస్యంగా ఆయన భావిస్తున్నారు. ఈ వింత ఉదంతం ఇప్పుడు నెట్టింట వైరల్‌గా మారింది.