ఐపీఎల్, వయోపరిమితి క్రికెట్‌లో అదరగొట్టిన 15 ఏళ్ల వైభవ్ సూర్యవంశీకి దులీప్ ట్రోఫీలో ఈస్ట్ జోన్ వైస్ కెప్టెన్‌గా బాధ్యతలు అప్పగించారు. అయితే, బెంగళూరులో నార్త్-ఈస్ట్ జోన్‌తో జరిగిన తన అరంగేట్ర మ్యాచ్‌లో వైభవ్ కేవలం 8 పరుగులు మాత్రమే చేసి అవుటయ్యాడు.

టాస్ గెలిచి బౌలింగ్ ఎంచుకున్న నార్త్-ఈస్ట్ జోన్ కెప్టెన్ రంగ్సేన్ జోనాథన్ నిర్ణయానికి తగినట్లే ప్రారంభంలోనే వికెట్ లభించింది. రెండో ఓవర్లో బిస్వోర్జిత్ కొంథౌజమ్ వేసిన మొదటి రెండు బంతులను వైభవ్ కవర్ డ్రైవ్‌తో వరుస ఫోర్లుగా మలిచాడు. కానీ, అదే ఓవర్ చివరి బంతికి మళ్లీ అదే షాట్ ఆడేందుకు ప్రయత్నించి ఎడ్జ్ కావడం వల్ల గల్లీలో ఉన్న ఫీల్డర్‌కు క్యాచ్ ఇచ్చి నిష్క్రమించాడు.

ఫస్ట్ క్లాస్ క్రికెట్‌లో ప్రస్తుతం 17.25 బ్యాటింగ్ సగటు మాత్రమే ఉన్న వైభవ్‌కు భారత టెస్టు జట్టులో చోటు సంపాదించడానికి ఈ టోర్నీ చాలా కీలకం. కాబట్టి ఈ వైఫల్యాన్ని మరచి వైభవ్ త్వరలోనే ఫామ్‌లోకి రావాలని భావిస్తున్నాడు.