బాలీవుడ్ నటి అమీషా పటేల్ ముంబై ఇంట్లో సంచలన దొంగతనం జరిగింది. నటి తల్లి ఆశా పటేల్ మెరైన్ డ్రైవ్ పోలీస్ స్టేషన్‌లో విలువైన బంగారం, వజ్రాల ఆభరణాలు దొంగిలించబడ్డాయని ఎఫ్‌ఐఆర్ నమోదు చేశారు. ఈ కేసుకు సంబంధించి పోలీసులు ఇప్పటికే ఒక పనిమనిషిని అరెస్టు చేశారు.

పోలీసు వర్గాల సమాచారం ప్రకారం, గత జనవరిలో చర్చ్‌గేట్‌లోని ఆశా పటేల్ నివాసం నుండి సుమారు రూ. 5 లక్షల విలువైన వజ్రాల గాజు అదృశ్యమైంది. మొదటి నుంచి పనిమనిషి సీమపైనే అనుమానం ఉండేది. దాదాపు 5-6 నెలల పాటు ఆభరణాలు తిరిగి ఇవ్వాలని పలుమార్లు అభ్యర్థించినా ఫలితం లేకపోయింది. చివరకు, అమీషా తల్లి పోలీసులను ఆశ్రయించింది. ఫిర్యాదు ఆధారంగా, పోలీసులు భారతీయ న్యాయ సంహితలోని సెక్షన్ 306 కింద కేసు నమోదు చేసి నిందితురాలిని విరార్ ప్రాంతం నుండి అరెస్టు చేశారు. కోర్టులో హాజరుపరచగా, సెప్టెంబర్ 15 వరకు ఆమెకు పోలీసు కస్టడీ విధించారు. ఆ పనిమనిషి దాదాపు ఏడాదిన్నరగా అక్కడ పనిచేస్తోంది. అయితే దొంగిలించబడిన ఆభరణాలను ఇంకా స్వాధీనం చేసుకోలేదు మరియు పోలీసులు ఈ ఘటనపై తదుపరి విచారణ జరుపుతున్నారు.