ఛత్తీస్‌గఢ్‌లోని జష్పూర్ జిల్లా కుంకురి ప్రాంతంలో వెలుగు చూసిన ఒక హృదయవిదారక ఘటన స్థానికులను భయాందోళనకు గురిచేసింది. రెమ్తే రోడ్‌లోని ఒక అద్దె ఇంట్లో 65 ఏళ్ల సబినా ఖల్ఖో అనే వృద్ధురాలి కుళ్ళిపోయిన శవాన్ని పోలీసులు స్వాధీనం చేసుకున్నారు. ఆమె 25 ఏళ్ల కుమారుడు ప్రవీణ్ ఖల్ఖో గత 20 రోజులుగా తన తల్లి మృతదేహంతోనే అదే గదిలో ఉంటున్నాడు. ఇంటి నుండి తీవ్రమైన దుర్వాసన రావడంతో యజమాని పోలీసులకు సమాచారం ఇవ్వగా అసలు విషయం బయటపడింది.

పోలీసుల ప్రాథమిక విచారణ ప్రకారం డిసెంబర్ 6వ తేదీనే అనారోగ్యంతో సబినా మరణించినట్లు తెలుస్తోంది. మద్యానికి బానిసైన ప్రవీణ్ ఈ విషయాన్ని ఎవరికీ చెప్పకుండా శవంతోనే కాలం గడిపాడు. పోలీసులు నిందితుడిని అదుపులోకి తీసుకుని విచారిస్తున్నారు. ఈ ఘటన వెనుక ఏదైనా కుట్ర ఉందా లేదా కేవలం నిర్లక్ష్యమేనా అనే కోణంలో పోలీసులు లోతుగా దర్యాప్తు చేస్తున్నారు. ఈ ఉదంతం స్థానికంగా తీవ్ర చర్చనీయాంశమైంది.