வெல்லத்தை வெறும் உணவாக மட்டுமல்லாமல், குறிப்பிட்ட மூலிகைகளுடன் சேர்த்து மருந்தாகப் பயன்படுத்தலாம் என ஆயுர்வேத நிபுணர் டாக்டர் மிஹிர் கத்ரி விளக்குகிறார். உடலில் நச்சுக்கள் சேர்ந்து மலம் ஒட்டும் நிலையில் இருந்தால், வெல்லத்துடன் சுக்கு சேர்த்து உட்கொள்ள வேண்டும். செரிமானக் கோளாறு உள்ளவர்கள் திப்பிலி பொடியுடனும், சிறுநீர் கழிப்பதில் சிரமம் உள்ளவர்கள் சீரகத்துடனும் வெல்லத்தைச் சேர்த்துச் சாப்பிடுவது சிறந்த பலனைத் தரும் என்று அவர் குறிப்பிட்டுள்ளார்.

மூல நோய் அல்லது பைல்ஸ் பிரச்சனையால் அவதிப்படுபவர்கள் வெல்லத்துடன் கடுக்காய் பொடியைச் சேர்த்துப் பயன்படுத்தலாம். நாட்டு வெல்லத்துடன் தேவையான மூலிகையைச் சம அளவில் கலந்து சிறிய உருண்டைகளாகச் செய்து வைத்துக்கொள்ள வேண்டும். காலை மற்றும் மாலை வேளைகளில் வெறும் வயிற்றில் வெதுவெதுப்பான நீருடன் இந்த உருண்டைகளை உட்கொள்வதன் மூலம் பல்வேறு உடல்நலப் பாதிப்புகளிலிருந்து இயற்கை முறையில் தீர்வு காண முடியும் என மருத்துவர் அறிவுறுத்துகிறார்.