தமிழகம், கேரளா, மேற்கு வங்கம், அசாம் மற்றும் புதுச்சேரி ஆகிய மாநிலங்களுக்கான தேர்தல் தேதியை இந்திய தேர்தல் ஆணையம் வரும் மார்ச் 15-ஆம் தேதி அறிவிக்க உள்ளதாகத் தகவல்கள் வெளியாகியுள்ளன. இதற்கான முதற்கட்ட ஆலோசனைகளை முடித்துள்ள தேர்தல் ஆணையம், தற்போது இறுதி கட்ட ஏற்பாடுகளைத் தீவிரப்படுத்தியுள்ளது. தமிழகத்தில் ஏப்ரல் 23-ஆம் தேதி வாக்குப்பதிவு நடைபெற அதிக வாய்ப்புள்ளதாகக் கூறப்படுகிறது.

பிரதமர் நரேந்திர மோடியின் திருச்சி வருகைக்குப் பிறகு இந்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. தேர்தல் தேதி அறிவிக்கப்பட்ட உடனே மாநிலம் முழுவதும் தேர்தல் நடத்தை விதிமுறைகள் உடனடியாக அமலுக்கு வரும். 234 தொகுதிகளைக் கொண்ட தமிழகத்தில் ஆட்சி மாற்றமா அல்லது தொடர்ச்சியா என்பதைத் தீர்மானிக்கும் இந்தத் தேர்தல் களம் இப்போதே சூடுபிடிக்கத் தொடங்கியுள்ளது.