இந்தியாவின் பாதுகாப்புத் திறனை அடுத்த கட்டத்திற்கு கொண்டு செல்லும் வகையில், டிஆர்டிஓ (DRDO) மிக நீண்ட தூரம் சென்று தாக்கக்கூடிய பினாகா ராக்கெட் அமைப்பின் புதிய எல்ஆர்ஜிஆர்-120 (LRGR-120) பதிப்பை வெற்றிகரமாக சோதனை செய்துள்ளது. உள்நாட்டு தொழில்நுட்பத்தில் உருவான இந்த நவீன அமைப்பு, வெறும் 44 வினாடிகளில் 12 ராக்கெட்டுகளை ஏவும் திறன் கொண்டது. ஜிபிஎஸ் மற்றும் நேவிகேஷன் தொழில்நுட்பத்துடன் மணிக்கு 5,700 கிமீ வேகத்தில் செல்லும் இந்த ராக்கெட்டுகள், 120 கிலோமீட்டர் தொலைவில் பதுங்கியிருக்கும் எதிரிகளின் இலக்குகளைத் துல்லியமாகத் தாக்கி அழிக்கும் வல்லமை கொண்டவை.

பாதுகாப்பு அமைச்சகம் இந்த புதிய பினாகா எம்கே-3 அமைப்பை ராணுவத்தில் சேர்க்க ஒப்புதல் அளித்துள்ளது. கார்கில் போரில் முக்கிய பங்கு வகித்த பினாகாவின் ஆரம்ப கால வரம்பு 60 கிமீ ஆக மட்டுமே இருந்தது, தற்போது அது இரண்டு மடங்காக அதிகரிக்கப்பட்டுள்ளது. சிவபெருமானின் வில்லின் பெயரால் அழைக்கப்படும் இந்த ஏவுகணை அமைப்பு, எதிரி நாட்டு டாங்கிகள் மற்றும் கண்ணிவெடிகளைத் தகர்க்கும் திறன் கொண்டது. ஆர்மீனியா போன்ற நாடுகள் ஏற்கனவே இந்தியாவிலிருந்து இந்த ஆயுதத்தை வாங்கியுள்ள நிலையில், உலக அரங்கில் இந்தியாவின் ராணுவ பலம் மேலும் அதிகரித்துள்ளது.