தமிழக சட்டமன்றத் தேர்தல் நெருங்கும் வேளையில் திமுக கூட்டணியில் தொகுதிப் பங்கீடு சிக்கல் நீடிக்கிறது. விசிக, சிபிஐ மற்றும் சிபிஎம் ஆகிய கட்சிகள் கூடுதல் தொகுதிகளைக் கோருவதால், தேமுதிகவுக்கு ஒதுக்கப்பட்ட 9 இடங்களை 7 ஆகக் குறைக்க திமுக தலைமை முடிவு செய்துள்ளதாகத் தெரிகிறது. இதனால் அக்கட்சியின் பொதுச்செயலாளர் பிரேமலதா விஜயகாந்த் கடும் அதிருப்தியில் உள்ளதாகக் கூறப்படுகிறது.

அமைச்சர் எ.வ.வேலு மூலம் இந்த பேச்சுவார்த்தைகளை திமுக முன்னெடுத்து வருகிறது. முன்னதாக ராஜ்யசபா சீட் வழங்கப்பட்டபோது பிரேமலதா காட்டிய உற்சாகமின்மைக்கு இந்த தொகுதி குறைப்பு நடவடிக்கையே காரணம் என அரசியல் வட்டாரங்கள் தெரிவிக்கின்றன. கூட்டணி கட்சிகளைச் சமரசம் செய்ய தேமுதிகவின் பலத்தை திமுக குறைக்குமா என்ற எதிர்பார்ப்பு அதிகரித்துள்ளது.