மத்திய உள்துறை அமைச்சர் அமித் ஷா, சத்தீஸ்கரின் ஜகதல்பூரில் நடைபெற்ற நிகழ்ச்சியில் நக்சலைட்டுகளுக்குக் கடும் எச்சரிக்கை விடுத்துள்ளார். வரும் 2026 மார்ச் 31-க்குள் நாட்டிலிருந்து நக்சலிசம் முற்றிலும் ஒழிக்கப்படும் என்று உறுதியளித்த அவர், ஆயுதங்களைக் கைவிட்டு சரணடையும் இளைஞர்களுக்குக் கௌரவமான மறுவாழ்வு அளிக்கப்படும் என்றார். வன்முறையைத் தேர்ந்தெடுப்பவர்கள் மீது கடும் நடவடிக்கை எடுக்கப்படும் என்றும் அவர் தெளிவுபடுத்தினார்.

பஸ்தர் பிராந்தியத்தின் வளர்ச்சிக்காக மின்சாரம், கல்வி மற்றும் வேலைவாய்ப்புகளை உள்ளடக்கிய விரிவான திட்டங்களை அரசு செயல்படுத்தி வருவதாக அவர் குறிப்பிட்டார். துப்பாக்கி கலாச்சாரத்தை விடுத்து, பஸ்தரின் கலாச்சாரப் பெருமையை உலகுக்குக் கொண்டு செல்வதே பிரதமர் மோடியின் இலக்கு என்று அமித் ஷா தெரிவித்தார். இப்பகுதியை அடுத்த ஐந்து ஆண்டுகளில் நாட்டின் முன்னேறிய பழங்குடியினப் பிரிவாக மாற்ற அரசு உறுதிபூண்டுள்ளது.