வட இந்தியாவில் நிலவும் கடும் குளிரை சமாளிக்க பலர் அறையினுள் கரிக்கடுப்புகளை (Angithi) பயன்படுத்துகின்றனர், ஆனால் இது உயிருக்கே ஆபத்தான விளைவுகளை ஏற்படுத்தும் என மருத்துவர்கள் எச்சரிக்கின்றனர். ஆர்எம்எல் மருத்துவமனை மருத்துவர் சுபாஷ் கிரி கூறுகையில், போதிய காற்றோட்டம் இல்லாத மூடிய அறையில் கரிக்கடுப்பை எரிப்பது சுவாசக் கோளாறுகளை உண்டாக்கி மரணத்திற்கு வழிவகுக்கும் என்று தெரிவித்துள்ளார்.

மூடிய அறையில் நிலக்கரி எரியும் போது நிறமற்ற, மணமற்ற கார்பன் மோனாக்சைடு வாயு வெளியாகிறது. இது ரத்தத்தில் உள்ள ஆக்சிஜன் அளவை குறைத்து தலைச்சுற்றல், மயக்கம் மற்றும் தூக்கத்திலேயே உயிரிழப்பை ஏற்படுத்தக்கூடும். எனவே, உறங்குவதற்கு முன் கரிக்கடுப்பை அணைப்பதையும், அறையின் ஜன்னல்களைத் திறந்து வைப்பதையும் மக்கள் உறுதி செய்ய வேண்டும் என அறிவுறுத்தப்படுகிறது.