தலைநகரின் மேஜர் தியான் சந்த் தேசிய மைதானத்தில் ‘டெல்லி சப்தோத்சவ் 2026’ இலக்கியத் திருவிழா இன்று ஜனவரி 2 முதல் தொடங்குகிறது. டெல்லி முதல்வர் ரேகா குப்தா இதனைத் தொடங்கி வைக்க, குடியரசுத் துணைத் தலைவர் சி.பி. ராதாகிருஷ்ணன் தலைமை விருந்தினராகப் பங்கேற்கிறார். இந்த விழாவை ஜிகாதிகள் மற்றும் நக்சலைட்டுகளின் கருத்தியல் பயங்கரவாதத்திற்கு எதிரான ஒரு ‘சர்ஜிகல் ஸ்டிரைக்’ என்று டெல்லி அமைச்சர் கபில் மிஸ்ரா வர்ணித்துள்ளது பெரும் பரபரப்பை ஏற்படுத்தியுள்ளது.

ஜனவரி 4 வரை நடைபெறும் இந்த மூன்று நாள் விழாவில் நூற்றுக்கும் மேற்பட்ட எழுத்தாளர்கள், திரைப்பட இயக்குநர்கள் மற்றும் பத்திரிகையாளர்கள் கலந்து கொள்கின்றனர். 40-க்கும் மேற்பட்ட புத்தகங்கள் வெளியீட்டுடன், மாலை நேரங்களில் கலை நிகழ்ச்சிகளும் விதவிதமான உணவு அரங்குகளும் இடம்பெறவுள்ளன. பொதுமக்கள் எவ்வித நுழைவுக் கட்டணமும் இன்றி இதில் பங்கேற்கலாம். இது வெறும் இலக்கிய நிகழ்வு மட்டுமல்லாமல், நாட்டின் கலாச்சார மற்றும் கருத்தியல் விழிப்புணர்வின் அடையாளமாகப் பார்க்கப்படுகிறது.