టీమ్ ఇండియా హెడ్ కోచ్ గౌతమ్ గంభీర్ పర్యవేక్షణలో భారత టెస్ట్ జట్టు ప్రదర్శన ఆందోళనకరంగా మారింది. గత పది సంవత్సరాలలో ఎన్నడూ లేని విధంగా సొంతగడ్డపై న్యూజిలాండ్ చేతిలో క్లీన్ స్వీప్ అవ్వడం, ఆస్ట్రేలియాలో బోర్డర్-గవాస్కర్ ట్రోఫీని కోల్పోవడంతో గంభీర్ కోచింగ్‌పై విమర్శలు వెల్లువెత్తుతున్నాయి. గంభీర్ హయాంలో ఆడిన 19 టెస్టుల్లో భారత్ 10 మ్యాచ్‌ల్లో ఓటమి పాలు కావడంతో, బీసీసీఐ ఇప్పుడు టెస్ట్ జట్టు కోసం ప్రత్యేక కోచ్‌ను నియమించాలని భావిస్తోంది.

ఈ క్రమంలో బోర్డు అధికారులు భారత దిగ్గజం వీవీఎస్ లక్ష్మణ్‌ను సంప్రదించినట్లు వార్తలు వస్తున్నాయి. అయితే పూర్తిస్థాయి కోచ్‌గా బాధ్యతలు చేపట్టేందుకు లక్ష్మణ్ ఆసక్తి చూపలేదని సమాచారం. ప్రస్తుతం బెంగళూరులోని సెంటర్ ఆఫ్ ఎక్సలెన్స్ చీఫ్‌గా కొనసాగడానికే ఆయన మొగ్గు చూపుతున్నట్లు తెలుస్తోంది. దీంతో లక్ష్మణ్‌ను ఒప్పించేందుకు బీసీసీఐ ప్రయత్నిస్తుందా లేదా మరో కొత్త పేరును పరిశీలిస్తుందా అన్నది ఇప్పుడు క్రికెట్ వర్గాల్లో ఆసక్తికరంగా మారింది.