భారత మహిళా క్రికెట్ స్టార్ స్మృతి మంధాన అంతర్జాతీయ క్రికెట్‌లో 10 వేల పరుగుల మైలురాయిని చేరుకుని అరుదైన ఘనత సాధించారు. శ్రీలంకతో జరిగిన నాలుగో టీ20లో ఈ రికార్డును నెలకొల్పిన ఆమె, మిథాలీ రాజ్ తర్వాత ఈ ఘనత సాధించిన రెండో భారతీయ క్రీడాకారిణిగా నిలిచారు. ఈ మ్యాచ్‌లో కేవలం 48 బంతుల్లోనే 80 పరుగులు చేసి స్మృతి జట్టు విజయంలో కీలక పాత్ర పోషించారు.

ఇదే మ్యాచ్‌లో మూడు సిక్సర్లు బాదడం ద్వారా టీ20ల్లో అత్యధిక సిక్సర్లు కొట్టిన భారతీయ మహిళా క్రికెటర్‌గా మంధాన చరిత్ర సృష్టించారు. 80 సిక్సర్లతో ఆమె కెప్టెన్ హర్మన్‌ప్రీత్ కౌర్ పేరిట ఉన్న రికార్డును అధిగమించారు. ప్రస్తుతం 151 ఇన్నింగ్స్‌లలో 80 సిక్సర్లతో అగ్రస్థానంలో కొనసాగుతుండగా, షెఫాలీ వర్మ 69 సిక్సర్లతో మూడో స్థానంలో ఉన్నారు. స్మృతి మంధాన వరుస విజయాలు భారత క్రికెట్ స్థాయిని మరింత పెంచుతున్నాయి.