యెమెన్‌లోని ముకల్లా నౌకాశ్రయంపై సౌదీ అరేబియా వైమానిక దాడుల నేపథ్యంలో మధ్యప్రాచ్యంలో ఉద్రిక్తతలు పెరిగాయి. ఈ క్రమంలో యెమెన్ నుండి తమ మిగిలిన సైన్యాన్ని ఉపసంహరించుకుంటున్నట్లు యూఏఈ ప్రకటించింది. సౌదీ అరేబియా భద్రత పట్ల తమకు పూర్తి నిబద్ధత ఉందని స్పష్టం చేస్తూనే, వేర్పాటువాద సంస్థ ఎస్.టి.సికి ఆయుధాలు సరఫరా చేస్తున్నామన్న ఆరోపణలను యూఏఈ తోసిపుచ్చింది. ఉగ్రవాద వ్యతిరేక దళాల మిషన్‌ను స్వచ్ఛందంగా ముగిస్తున్నట్లు యూఏఈ వెల్లడించింది.

మరోవైపు, యెమెన్ అధ్యక్షుడు రషాద్ అల్-అలిమి తన అధికారాలను దుర్వినియోగం చేస్తున్నారని ఎస్.టి.సి ఆరోపించింది. యూఏఈతో కుదుర్చుకున్న రక్షణ ఒప్పందాన్ని రద్దు చేసే అధికారం అధ్యక్షుడికి లేదని పేర్కొంది. అయితే ముకల్లా నౌకాశ్రయానికి వచ్చిన నౌకల ద్వారా భారీగా ఆయుధాలు తరలిస్తున్నట్లు సౌదీ నిఘా వర్గాలు అనుమానిస్తున్నాయి. దశాబ్దాలుగా మిత్రదేశాలుగా ఉన్న సౌదీ మరియు యూఏఈ మధ్య తలెత్తిన ఈ విభేదాలు ఇప్పుడు ప్రాంతీయ రాజకీయాల్లో చర్చనీయాంశంగా మారాయి.