வறுமையும் மொழித்தடையும் கனவுகளுக்குத் தடையல்ல என்பதை நிரூபித்தவர் நாசா விண்வெளி வீரர் ஜோஸ் ஹெர்னாண்டஸ். விவசாயக் கூலித் தொழிலாளியின் மகனாகப் பிறந்து, 12 வயது வரை ஆங்கிலம் தெரியாமல் வயல்வெளிகளில் வேலை செய்தவர் இவர். தந்தையின் வழிகாட்டுதலில் கல்வியைத் தொடர்ந்து, மார்பகப் புற்றுநோயைக் கண்டறியும் டிஜிட்டல் மேமோகிராஃபி கருவியை உருவாக்கிய பொறியாளராகப் பரிணமித்தார்.

விண்வெளி வீரராகும் கனவில் நாசாவால் தொடர்ந்து 11 முறை நிராகரிக்கப்பட்டும் ஜோஸ் தளரவில்லை. பைலட் பயிற்சி மற்றும் ரஷ்ய மொழியைக் கற்றுத் தேர்ந்து, 12-வது முயற்சியில் 2004-ல் நாசாவில் இணைந்தார். 2009-ல் விண்வெளிக்குச் சென்று சரித்திரம் படைத்த இவரது வாழ்க்கை ‘ஏ மில்லியன் மைல்ஸ் அவே’ (A Million Miles Away) திரைப்படமாக வெளியாகி உலகையே வியக்க வைத்தது. கடின உழைப்பும் விடாமுயற்சியும் யாரையும் சிகரத்தில் அமரவைக்கும் என்பதற்கு இவரே சாட்சி.