தென்னாப்பிரிக்காவின் ஜோகன்னஸ்பர்க்கிற்கு அருகில் உள்ள எம்போனெங் தங்கச் சுரங்கம், மனித பொறியியல் மற்றும் விடாமுயற்சியின் ஒரு அதிசயமாகத் திகழ்கிறது. பூமியின் ஆழத்தில் இவ்வளவு பெரிய அமைப்பு இருப்பது உலகையே ஆச்சரியத்தில் ஆழ்த்தியுள்ளது. இது தொடர்பான தகவல்கள் தற்போது சமூக வலைதளங்களில் வைரலாகி வருகின்றன.

உலகின் ஆழமான இந்தச் சுரங்கம் சுமார் 4 கிலோமீட்டர் (4,000 மீட்டர்) ஆழம் கொண்டது. இதன் ஆழத்தை கற்பனை செய்து பார்ப்பது கூட கடினம். உலகின் மிக உயரமான கட்டிடமான துபாயின் ‘புர்ஜ் கலீஃபா’ போன்ற ஐந்து கட்டிடங்களை ஒன்றன் மேல் ஒன்றாக அடுக்கினால் எவ்வளவு உயரம் இருக்குமோ, அவ்வளவு ஆழமானது இது. இது வெறும் குழி அல்ல, பூமிக்கு அடியில் இயங்கும் ஒரு சிறிய நகரம் போன்ற கட்டமைப்பாகும்.

பூமிக்கு அடியில் செல்லச் செல்ல வெப்பம் அதிகரிப்பது இயல்பானது. 4 கிலோமீட்டர் ஆழத்தில் உள்ள பாறைகளின் வெப்பம் சுமார் 66 டிகிரி செல்சியஸாக உள்ளது. இந்த வெப்பத்தில் மனிதர்கள் உயிர்வாழ்வது சாத்தியமற்றது. இதற்காகவே அங்கு பிரம்மாண்டமான குளிரூட்டும் வசதிகள் செய்யப்பட்டுள்ளன. தினமும் ஆயிரக்கணக்கான டன் பனி மற்றும் சேற்றின் குளிர்ந்த கலவை குழாய்கள் மூலம் உள்ளே அனுப்பப்படுகிறது. இது சுரங்கத்தின் வெப்பநிலையை 28 டிகிரி செல்சியஸில் பராமரிக்க உதவுகிறது. இந்த ஏசி வசதி இல்லையென்றால், தொழிலாளர்களால் ஒரு நிமிடம் கூட அங்கு இருக்க முடியாது.

இங்கு பணியாற்றும் தொழிலாளர்களின் பயணம் மிகவும் சாகசமானது. மேற்பரப்பில் இருந்து சுரங்கத்தின் கடைசிப் பகுதியை அடைய சுமார் 90 நிமிடங்கள் ஆகும். இதற்காக பயன்படுத்தப்படும் லிஃப்ட்கள் வினாடிக்கு 16 மீட்டர் வேகத்தில் பயணிக்கின்றன. இது உலகின் அதிவேகப் பயணங்களில் ஒன்றாகும். இவ்வளவு கடினமான சூழலில் ஒரு டன் பாறையைத் தோண்டினால் வெறும் 8 முதல் 10 கிராம் தங்கம் மட்டுமே கிடைக்கிறது. இருப்பினும், ஆண்டுதோறும் இந்தச் சுரங்கத்திலிருந்து சுமார் 8,000 கிலோ தங்கம் எடுக்கப்படுகிறது. ஆக்சிஜன் பற்றாக்குறையைத் தவிர்க்க ராட்சத குழாய்கள் மூலம் சுத்தமான காற்று உள்ளே செலுத்தப்படுகிறது. நவீன தொழில்நுட்பத்தின் உதவியுடன் இவ்வளவு சவாலான சூழலில் தங்கம் எடுக்கப்படுவது உலகையே வியக்க வைக்கிறது.