பெங்களூருவைச் சேர்ந்த 50 வயது நபர் ஒருவர், டெலிகிராமில் தற்செயலாக வந்த ஒரு ‘மன்னிக்கவும்’ (Sorry) என்ற செய்தியால் தனது வாழ்நாள் சேமிப்பான 70 லட்சம் ரூபாயை இழந்துள்ளார். லண்டன் தொழிலதிபர் என அடையாளப்படுத்திக் கொண்ட பெண் ஒருவரின் நட்பு, லாபகரமான பிட்காயின் முதலீடு என்ற ஆசையைத் தூண்டியுள்ளது. ஆரம்பத்தில் சிறிய லாபத்தைக் காட்டி நம்பிக்கையை ஏற்படுத்திய அந்தப் பெண், ஒரு போலி வர்த்தகத் தளத்தின் மூலம் அந்த நபரை பெரும் தொகையை முதலீடு செய்ய வைத்துள்ளார்.

அதிக லாபம் கிடைக்கும் என்ற நோக்கத்தில் வங்கிக் கடன்பெற்று சுமார் 60 லட்சம் ரூபாய் வரை எட்டு வெவ்வேறு கணக்குகளுக்கு அவர் மாற்றியுள்ளார். அவரது கணக்கில் கோடி கணக்கில் பணம் இருப்பது போல டிஜிட்டல் திரையில் காட்டப்பட்டாலும், பணத்தை எடுக்க முயன்றபோதுதான் அது ஏமாற்று வேலை என்பது தெரியவந்தது. பாதிக்கப்பட்ட நபர் தற்போது தேசிய சைபர் கிரைம் பிரிவில் புகார் அளித்துள்ளார். அறிமுகமில்லாத நபர்களிடம் இருந்து வரும் குறுஞ்செய்திகள் குறித்து பொதுமக்கள் எச்சரிக்கையாக இருக்க இந்தச் சம்பவம் அறிவுறுத்துகிறது.