ஈரானில் கடந்த ஆண்டு டிசம்பர் மாதம் முதல் அரசுக்கு எதிரான போராட்டங்கள் தீவிரமடைந்துள்ளன. ஆயிரக்கணக்கான ஆண்களும் பெண்களும் வீதியில் இறங்கி போராடி வரும் நிலையில், ஈரான் பாதுகாப்புப் படையினர் (Islamic Revolutionary Guard Corps) இந்த போராட்டத்தை ஒடுக்க கையாளும் முறைகள் உலகையே அதிரவைத்துள்ளன.

பெண்களுக்கு எதிரான கொடூரங்கள்

ஈரானிய வம்சாவளியைச் சேர்ந்த ஜெர்மன் பத்திரிகையாளர் மிச்செல் அப்துல்லாஹி வெளியிட்டுள்ள தகவல்கள் ஈரான் அரசாங்கத்தின் கொடூர முகத்தை வெளிச்சம் போட்டுக் காட்டியுள்ளன. ஆரம்பத்தில் போராட்டத்தைக் கைவிடக் கோரி பெண்களுக்கு பாலியல் மிரட்டல்கள் விடுக்கப்பட்டன. ஆனால், அதையும் மீறி போராட்டம் தீவிரமடைந்ததால், பாதுகாப்புப் படையினர் பெண்கள் மற்றும் சிறுமிகளை கடத்திச் சென்று பாலியல் வன்கொடுமை செய்ததாகக் கூறப்படுகிறது.

ஜெர்மன் நாளிதழ் ‘டை வெல்ட்’ (Die Welt) வெளியிட்டுள்ள அறிக்கையின்படி, பெண்களுக்கு இழைக்கப்படும் கொடுமைகள் பின்வருமாறு:

• பாலியல் வன்கொடுமை: போராட்டக்காரர்களை முடக்க பெண்கள் மீது பாலியல் ரீதியான தாக்குதல்கள் நடத்தப்படுகின்றன.
• மருத்துவக் கொடூரம்: பிடிபடும் பெண்களின் கருப்பை வலுக்கட்டாயமாக அகற்றப்படுவதாக அதிர்ச்சியூட்டும் தகவல்கள் வெளியாகியுள்ளன.
• உடல் ரீதியான சித்திரவதை: பெண்களின் தலைமுடியை தோலோடு சேர்த்து பிடுங்கி எறிவது போன்ற மனிதாபிமானமற்ற செயல்களில் ஈரான் படையினர் ஈடுபட்டுள்ளனர்.
• ஆதாரங்களை அழித்தல்: பாலியல் அத்துமீறல்களுக்கான ஆதாரங்கள் சிக்காமல் இருக்க, கொல்லப்பட்ட பெண்களின் உடல்கள் எரிக்கப்படுவதாகவும் புகார்கள் எழுந்துள்ளன.

சர்வதேச கவலை

ஈரானின் உச்ச தலைவர் அயதுல்லா அலி காமேனி, போராட்டக்காரர்களைக் கண்டதும் சுட உத்தரவிட்டுள்ளதாகத் தெரிகிறது. விலைவாசி உயர்வு மற்றும் கடுமையான மதக் கட்டுப்பாடுகளுக்கு எதிராக நடக்கும் இந்தப் போராட்டத்தில் இதுவரை 3,000 முதல் 16,000 பேர் வரை உயிரிழந்திருக்கலாம் எனப் பல்வேறு அறிக்கைகள் தெரிவிக்கின்றன. ஈரானின் இந்த அராஜகப் போக்கு சர்வதேச சமூகத்தினிடையே பெரும் கொந்தளிப்பை ஏற்படுத்தியுள்ளது.