వర్ధమాన్‌లోని బీజేపీ జిల్లా కార్యాలయానికి బీహార్ రిజిస్ట్రేషన్ నంబర్లతో ఉన్న 55 బైకులు రావడం రాజకీయంగా కలకలం రేపింది. అసెంబ్లీ ఎన్నికల ముందు అశాంతి సృష్టించేందుకే వీటిని తెప్పించారని తృణమూల్ కాంగ్రెస్ (TMC) ఆరోపించింది. ఎమ్మెల్యే ఖోకాన్ దాస్ నేతృత్వంలో టీఎంసీ కార్యకర్తలు రైల్వే పార్సెల్ కార్యాలయం వద్ద ధర్నాకు దిగారు. బైకుల తాలూకు పూర్తి పత్రాలను బహిర్గతం చేసే వరకు తమ నిరసన కొనసాగుతుందని వారు స్పష్టం చేశారు.

అయితే, ఈ ఆరోపణలను బీజేపీ నేత దేవజ్యోతి సింగ్ రాయ్ కొట్టిపారేశారు. రాడ్ బంగా జోన్ ఎన్నికల ప్రచార పనుల కోసమే ఈ బైకులను బీహార్ నుండి తెప్పించామని, ప్రతి ఎన్నికల సమయంలో ఇది సాధారణమేనని ఆయన వివరించారు. అధికార పార్టీ అనవసరంగా రాద్ధాంతం చేస్తోందని బీజేపీ మండిపడింది. ప్రస్తుతం ఈ బైకుల వ్యవహారం ఇరు పార్టీల మధ్య తీవ్ర మాటల యుద్ధానికి దారితీసింది.