உத்தரபிரதேச மாநிலம் முராதாபாத்தில் அதிர்ச்சி அளிக்கும் சம்பவம் நிகழ்ந்துள்ளது. அங்கு 23 வயதுடைய தாய் ஒருவர் தனது 15 நாள் பச்சிளம் குழந்தையை ஃபிரிட்ஜில் வைத்துள்ளார். குழந்தையின் அழுகை சத்தம் கேட்டு, பாட்டி அவரை சரியான நேரத்தில் மீட்டு மருத்துவமனைக்கு கொண்டு சென்றதால், குழந்தை உயிர் பிழைத்தது. ஆரம்பத்தில், குடும்பத்தினர் மருமகளுக்கு ‘பேய் பிடித்திருக்கலாம்’ என்று சந்தேகப்பட்டு மந்திரவாதியிடம் அழைத்துச் சென்றனர். ஆனால், மருத்துவர்கள் அவர் பிரசவத்திற்குப் பிந்தைய மனநோயால் (Postpartum Disorder) பாதிக்கப்பட்டுள்ளதை உறுதி செய்தனர்.

மனநலக் கோளாறால் பாதிக்கப்பட்டிருந்த அந்தப் பெண், மன அழுத்தத்தின் காரணமாகவே இத்தகைய அபாயகரமான நடவடிக்கையை எடுத்துள்ளார். தற்போது, ​​மனநல மருத்துவரின் (Psychiatrist) மேற்பார்வையில் அவருக்கு சிகிச்சை அளிக்கப்பட்டு வருகிறது. இந்த சம்பவம் அப்பகுதியில் பரபரப்பை ஏற்படுத்தியுள்ளதுடன், பிரசவத்திற்குப் பிறகு பெண்களின் மன ஆரோக்கியம் குறித்து குடும்பத்தினர் விழிப்புடன் இருக்க வேண்டும் என்றும், இத்தகைய மனநலப் பிரச்சினைகளுக்கு உரிய நேரத்தில் சிகிச்சை அளிப்பது அவசியம் என்றும் மருத்துவர்கள் வலியுறுத்தியுள்ளனர்.