ஹைதராபாத் ஜெகத்கிரிகுட்டா பகுதியில் புத்தாண்டு கொண்டாட்டத்தின் போது நடைபெற்ற விருந்தில் பங்கேற்றவர்களில் ஒருவர் உயிரிழந்தார் மற்றும் 11 பேர் மருத்துவமனையில் அனுமதிக்கப்பட்டுள்ளனர். புதன்கிழமை இரவு நடைபெற்ற இந்த விருந்தில் சிக்கன் பிரியாணி மற்றும் மது பரிமாறப்பட்டது. மறுநாள் மதியம் பலருக்கு கடுமையான வயிற்று வலி மற்றும் வாந்தி ஏற்பட்ட நிலையில், 53 வயதான ராமன் பாண்டு சிகிச்சை பலனின்றி உயிரிழந்தார். இதனால் அப்பகுதியில் பெரும் சோகம் ஏற்பட்டுள்ளது.

இந்த சம்பவம் குறித்து வழக்குப்பதிவு செய்துள்ள போலீசார், தடயவியல் குழுவுடன் இணைந்து உணவு மற்றும் மது மாதிரிகளை சேகரித்துள்ளனர். சமையலின் போது உள்ளூர் கடையிலிருந்து வாங்கப்பட்ட மசாலா தூள் காரணமாக விஷமாகியிருக்கலாம் என்று சந்தேகிக்கப்படுகிறது. உடற்கூறாய்வு அறிக்கை வந்த பின்னரே மரணத்திற்கான உண்மையான காரணம் தெரியவரும் என்று உதவி போலீஸ் கமிஷனர் நரேஷ் ரெட்டி தெரிவித்துள்ளார்.