சென்னை மடிப்பாக்கத்தைச் சேர்ந்த மாணவன் சாய் கார்த்திக், எதிர்பாராத விபத்தால் முதுகெலும்பில் காயமடைந்து நடக்க முடியாத நிலையில் உள்ளார். இருப்பினும், தனது ஓராண்டு உழைப்பு வீணாகக்கூடாது என்ற உறுதியுடன், பள்ளி கல்வித்துறையின் சிறப்பு அனுமதி பெற்று ஆம்புலன்ஸ் மூலம் தேர்வு மையத்திற்கு வந்தார். உடல்நலக்குறைவையும் பொருட்படுத்தாமல் தேர்வெழுத வந்த அவரது தன்னம்பிக்கை அனைவரையும் வியப்பில் ஆழ்த்தியது.

பேனாவைப் பிடித்து எழுத முடியாத சூழலில், ஒரு ஆசிரியையின் உதவியுடன் சாய் கார்த்திக் விடைகளைச் சொல்ல, அவர் விடைத்தாளில் எழுதினார். ஸ்ட்ரெச்சரில் படுத்தபடி அவர் காட்டிய இந்த விடாமுயற்சி அங்கிருந்த ஆசிரியர்களையும் மாணவர்களையும் நெகிழ்ச்சியில் ஆழ்த்தியது. மே 20-ம் தேதி தேர்வு முடிவுகள் வெளியாக உள்ள நிலையில், இந்த மாணவனின் மன உறுதிக்கு பாராட்டுகள் குவிந்து வருகின்றன.