இந்தியாவில் சீன செயலிகள் தடை செய்யப்பட்டது போலவே, தற்போது ரஷ்யாவில் முன்னணி தகவல் தொடர்பு செயலியான வாட்ஸ்அப் (WhatsApp) தடை செய்யப்பட்டுள்ளது. அதோடு மட்டுமல்லாமல், ரஷ்யாவில் உருவான டெலிகிராம் (Telegram) செயலிக்கும் கடுமையான கட்டுப்பாடுகளை புதின் அரசாங்கம் விதித்துள்ளது.

10 கோடி பயனர்கள் பாதிப்பு: அதிருப்தியில் வாட்ஸ்அப்

ரஷ்ய அரசின் இந்த அதிரடி முடிவால் சுமார் 10 கோடிக்கும் அதிகமான பயனர்கள் பாதிக்கப்படுவார்கள் என்றும், இது மக்களின் பாதுகாப்பைக் குறைக்கும் என்றும் வாட்ஸ்அப் நிறுவனம் கவலை தெரிவித்துள்ளது. இது குறித்து அந்நிறுவனம் வெளியிட்டுள்ள அறிக்கையில்:

“மக்களின் பாதுகாப்பான தகவல் தொடர்பைத் துண்டித்து, அவர்களை அரசின் கண்காணிப்பில் உள்ள செயலிகளை நோக்கித் தள்ளுவதற்காகவே ரஷ்ய அரசு வாட்ஸ்அப்பை முடக்கியுள்ளது. இது ஒரு பிற்போக்குத்தனமான நடவடிக்கை. எங்களது பயனர்களைத் தொடர்ந்து இணைப்பில் வைத்திருக்க தேவையான அனைத்து முயற்சிகளையும் நாங்கள் மேற்கொள்வோம்.”

“இது சர்வாதிகாரப் போக்கு”: டெலிகிராம் நிறுவனர் காட்டம்

டெலிகிராம் செயலியின் நிறுவனர் பாவெல் துரோவ், ரஷ்ய அரசின் இந்த நடவடிக்கையை கடுமையாகச் சாடியுள்ளார். “இது ஒரு முழுமையான சர்வாதிகார நடவடிக்கை” என்று குறிப்பிட்ட அவர், எத்தகைய அழுத்தங்கள் வந்தாலும் டெலிகிராம் தனது பயனர்களின் சுதந்திரம் மற்றும் தனியுரிமைக்காகத் தொடர்ந்து நிற்கும் என்று உறுதியளித்துள்ளார்.

அரசுக்குச் சொந்தமான செயலிகளைப் பயன்படுத்துமாறு மக்களைக் கட்டாயப்படுத்துவது, அரசியல் தணிக்கை மற்றும் கண்காணிப்பு நடவடிக்கைகளுக்கே வழிவகுக்கும் என்றும் அவர் எச்சரித்துள்ளார்.

மாற்றாக உருவெடுக்கும் ‘MAX’ செயலி

ரஷ்யாவுக்கும் வெளிநாட்டு செயலிகளுக்கும் இடையே நீண்ட காலமாக மோதல் நிலவி வரும் சூழலில், உக்ரைன் போருக்குப் பிறகு இந்த மோதல் உச்சகட்டத்தை எட்டியுள்ளது. இதன் விளைவாகவே வாட்ஸ்அப் மற்றும் டெலிகிராம் மீதான இந்த அதிரடி நடவடிக்கை எடுக்கப்பட்டுள்ளது.

இந்த செயலிகளுக்கு மாற்றாக, ரஷ்ய அரசு ‘MAX’ என்ற புதிய செயலியை அறிமுகப்படுத்தியுள்ளது. இதில் சாதாரண உரையாடல் வசதிகள் மட்டுமின்றி, அரசு ஆவணங்களைச் சேமித்து வைக்கும் வசதிகளும் உள்ளன.

மக்களின் அச்சம்

இருப்பினும், இந்த ‘MAX’ செயலி மக்களின் தனிப்பட்ட உரையாடல்களைக் கண்காணிக்கவே உருவாக்கப்பட்டுள்ளதாகப் பல்வேறு தரப்பினர் குற்றம் சாட்டுகின்றனர். ஆனால், இந்த புகார்களை ரஷ்ய அரசாங்கம் முற்றிலுமாக மறுத்துள்ளது.

இந்த அதிரடி மாற்றங்கள் ரஷ்யாவின் தகவல் தொடர்புத் துறையில் பெரும் பரபரப்பை ஏற்படுத்தியுள்ளன.