மத்திய கிழக்கில் நிலவும் போர் பதற்றத்தால் சர்வதேச சந்தையில் கச்சா எண்ணெய் விநியோகத்தில் சிக்கல் எழுந்துள்ள நிலையில் இந்தியாவின் எரிபொருள் பாதுகாப்பு குறித்து மத்திய அமைச்சர் ஹர்தீப் சிங் பூரி விளக்கமளித்துள்ளார். நாட்டின் தேவையைப் பூர்த்தி செய்ய போதுமான அளவு எண்ணெய் இருப்பு உள்ளதாகவும் நிலைமையைக் கண்காணிக்கச் சிறப்பு கட்டுப்பாட்டு அறை அமைக்கப்பட்டுள்ளதாகவும் அவர் உறுதியளித்துள்ளார். எத்தகைய நெருக்கடியையும் எதிர்கொள்ளும் வகையில் விசாகப்பட்டினம் மற்றும் மங்களூரு போன்ற மூலோபாய எண்ணெய் சேமிப்பு நிலையங்கள் தயார் நிலையில் வைக்கப்பட்டுள்ளன.

தற்போது இந்தியாவின் வசம் 50 நாட்களுக்கு மேலான எரிபொருள் இருப்பு உள்ளதாக அரசுத் தரப்பில் தெரிவிக்கப்பட்டுள்ளது. இறக்குமதி மூலங்களை இந்தியா பன்முகப்படுத்தியுள்ளதால் சர்வதேச சந்தையில் விலை மாற்றங்கள் இருந்தாலும் உள்நாட்டு விநியோகத்தில் பாதிப்பு ஏற்படாது எனத் தெரிகிறது. அரசின் இந்த முன்னெச்சரிக்கை நடவடிக்கைகளால் பொதுமக்கள் எரிபொருள் தட்டுப்பாடு குறித்து அச்சப்படத் தேவையில்லை என நிபுணர்கள் கருதுகின்றனர். நாட்டின் எரிசக்தி பாதுகாப்பை உறுதி செய்வதில் மத்திய அரசு தீவிரமாகச் செயல்பட்டு வருகிறது.