புதுச்சேரியில் பெட்ரோல், டீசல் மற்றும் சிலிண்டர் தட்டுப்பாடு நிலவுவதாக சமூக வலைதளங்களில் பரவும் தகவல்கள் முற்றிலும் பொய்யானவை என்று குடிமைப்பொருள் வழங்கல் துறை தெரிவித்துள்ளது. எண்ணெய் நிறுவனங்களுடன் ஆலோசிக்கப்பட்டு போதுமான கையிருப்பு உறுதி செய்யப்பட்டுள்ளது. விநியோகத்தைக் கண்காணிக்க மாநில மற்றும் மாவட்ட அளவில் சிறப்புக் குழுக்கள் அமைக்கப்பட்டு தடையற்ற விநியோகம் உறுதி செய்யப்படுகிறது.

பொதுமக்கள் தேவையற்ற அச்சத்தில் அதிகப்படியான எரிபொருளைச் சேமிக்க வேண்டாம் எனவும், அதிகாரப்பூர்வ தகவல்களை மட்டுமே நம்புமாறும் கேட்டுக்கொள்ளப்பட்டுள்ளனர். வீட்டு உபயோக சிலிண்டர்களை வணிக ரீதியாகப் பயன்படுத்தினால் கடும் நடவடிக்கை எடுக்கப்படும் என அரசு எச்சரித்துள்ளது. தற்போது நிலைமை சீராக உள்ளதால் மக்கள் அச்சப்படத் தேவையில்லை.