வங்கதேச பொதுத்தேர்தலில் மொத்தமுள்ள 299 இடங்களில் 87 இடங்களைக் கைப்பற்றி பிஎன்பி கட்சி தனிப்பெரும்பான்மையை நோக்கி முன்னேறி வருகிறது. அக்கட்சியின் தலைவர் தாரிக் ரஹ்மான் டாக்கா-17 மற்றும் போக்ரா-6 ஆகிய இரண்டு தொகுதிகளிலும் வெற்றி பெற்று சாதனை படைத்துள்ளார். வெற்றிக் கொண்டாட்டங்களுக்கு மத்தியில், தற்போதைய சூழலில் வெற்றி ஊர்வலங்கள் எதையும் நடத்த வேண்டாம் என்று அக்கட்சித் தலைமை அதிரடி முடிவெடுத்துள்ளது.

வாக்கு எண்ணிக்கையின் வெளிப்படைத்தன்மை குறித்து ஜமாத்-இ-இஸ்லாமி கட்சி கடும் அதிருப்தியை வெளிப்படுத்தியுள்ளது. தற்போது 29 இடங்களில் முன்னிலையில் உள்ள அந்த கட்சி, தேர்தல் ஆணையத்தின் ஒருதலைப்பட்சமான செயல்பாடு மற்றும் மர்மமான தோல்விகள் குறித்து புகார் அளித்துள்ளது. இந்த தேர்தல் முடிவுகள் அறிவிக்கப்பட்ட விதம் தங்களுக்கு மிகுந்த கவலையளிப்பதாக அக்கட்சித் தலைவர்கள் தெரிவித்துள்ளனர்.