தெரியாத எண்களில் இருந்து வரும் அழைப்புகளைக் கண்டறிய இனி ட்ரூ காலர் போன்ற செயலிகள் தேவையில்லை. மத்திய அரசு கொண்டு வரும் சிஎன்ஏபி தொழில்நுட்பம் சிம் கார்டு வாங்கும் போது வழங்கப்பட்ட கேஒய்சி விவரங்களின் அடிப்படையில் அழைப்பவரின் உண்மையான பெயரைத் திரையில் காட்டும். ரிலையன்ஸ் ஜியோ நிறுவனம் கேரளா உள்ளிட்ட பல மாநிலங்களில் இந்த சேவையைத் தொடங்கியுள்ளது. ஏர்டெல் மற்றும் வோடபோன் ஐடியா நிறுவனங்களும் பல்வேறு வட்டாரங்களில் இதன் சோதனையை மேற்கொண்டு வருகின்றன.

இந்த அம்சம் இணைய வசதி இல்லாமலேயே நேரடியாக மொபைல் நெட்வொர்க் மூலம் செயல்படும் என்பது குறிப்பிடத்தக்கது. ட்ரூ காலரில் பெயர்களை மாற்றிக்கொள்ள முடியும் ஆனால் சிஎன்ஏபி முறையில் அதிகாரப்பூர்வ தரவுகள் பயன்படுத்தப்படுவதால் தவறான தகவல்களை வழங்க முடியாது. பிஎஸ்என்எல் நிறுவனம் முதற்கட்டமாக மேற்கு வங்கத்தில் இந்த சேவையை அமல்படுத்தியுள்ளது. படிப்படியாக நாடு முழுவதும் இந்த நம்பகமான அழைப்பாளர் அடையாள முறை விரிவுபடுத்தப்பட உள்ளது.