ஜெர்மனியில் உயர் கல்வி பயிலச் சென்ற நூற்றுக்கணக்கான இந்திய மாணவர்கள் தற்போது விசா சிக்கலால் நாடு கடத்தப்படும் அபாயத்தை எதிர்கொண்டுள்ளனர். பெர்லினில் உள்ள சர்வதேச பல்கலைக்கழகத்தில் (IU) பயிலும் மாணவர்களுக்கு, அந்நாட்டு குடிவரவுத் துறை திடீரென வெளியேறும் நோட்டீஸை வழங்கியுள்ளது. ஆன்லைன் மற்றும் ஹைப்ரிட் பாடப்பிரிவுகள் தொடர்பான விதிகளில் ஏற்பட்ட மாற்றங்களே இந்த நெருக்கடிக்கு முக்கிய காரணமாகக் கூறப்படுகிறது. வளாகத்தில் நேரடி வகுப்புகள் நடக்கும் என்ற நம்பிக்கையில் சேர்ந்த மாணவர்கள், இப்போது தங்கள் கல்வி மற்றும் எதிர்காலம் குறித்து மிகுந்த கவலையில் உள்ளனர்.

கல்விக்காகப் பல லட்ச ரூபாய் கடன் வாங்கிய மாணவர்கள், இப்போது பாதியிலேயே படிப்பை கைவிட வேண்டிய சூழலுக்குத் தள்ளப்பட்டுள்ளனர். பல்கலைக்கழகம் மற்றும் குடிவரவுத் துறையின் விதிகளுக்கு இடையே நிலவும் குழப்பத்தால் மாணவர்கள் பாதிக்கப்பட்டுள்ளதாகக் கல்வி நிபுணர்கள் தெரிவிக்கின்றனர். சுமார் 20 ஆயிரம் யூரோக்களுக்கும் மேல் முதலீடு செய்துள்ள மாணவர்கள், இந்தியாவிலிருந்தே ஆன்லைனில் படிப்பை முடிக்குமாறு அறிவுறுத்தப்படுகிறார்கள். இந்தச் சம்பவம் சர்வதேச கல்வி முறையில் உள்ள குறைபாடுகளை வெளிச்சம் போட்டுக் காட்டியுள்ளதுடன், வெளிநாடு செல்லும் மாணவர்களுக்குப் பெரிய எச்சரிக்கையாகவும் அமைந்துள்ளது.