அலுவலகம் செல்பவர்கள் நீண்ட நேரம் சாக்ஸ் அணிவதால் கால்களில் தழும்பு ஏற்படுவது பொதுவானது. ஆனால், சாக்ஸைக் கழற்றிய பிறகும் பல மணிநேரம் அந்தத் தழும்பு மறையாமல் இருந்தால், அதைச் சாதாரணமான ஒன்றாகக் கருத வேண்டாம். கால்களில் வீக்கம் ஏற்படுவது அல்லது அழுத்தும் போது பள்ளம் விழுவது போன்றவை உடலில் ரத்த ஓட்டம் சீராக இல்லை என்பதைக் குறிக்கலாம். இது சிறுநீரகம், கல்லீரல் அல்லது இதயக் கோளாறுகளின் ஆரம்ப அறிகுறியாகவும் இருக்கலாம் என்று மருத்துவர்கள் எச்சரிக்கின்றனர்.

இந்த பாதிப்பிலிருந்து தப்பிக்க அதிக உப்பு சேர்ப்பதைத் தவிர்த்து, அதிகளவு தண்ணீர் குடிக்க வேண்டும். மென்மையான எலாஸ்டிக் கொண்ட பருத்தி சாக்ஸ்களைப் பயன்படுத்துவது மற்றும் நீண்ட நேரம் ஒரே இடத்தில் அமர்ந்திருப்பதைத் தவிர்ப்பது அவசியம். இருப்பினும், கால்களின் நிறம் மாறினாலோ அல்லது தொடர்ந்து வீக்கம் இருந்தாலோ, உடனடியாக மருத்துவரை அணுகுவது நல்லது. சிறிய தழும்பாகத் தெரிவது பெரிய உடல்நல பாதிப்பின் எச்சரிக்கையாக இருக்கலாம் என்பதால் விழிப்புணர்வுடன் இருப்பது அவசியம்.