திருவையாறு மற்றும் திருமானூர் பகுதிகளில் அஇஅதிமுக கூட்டணி வேட்பாளர்களை ஆதரித்து தமிழ் மாநில காங்கிரஸ் தலைவர் ஜி.கே.வாசன் தீவிர தேர்தல் பிரச்சாரத்தில் ஈடுபட்டார். அப்போது பேசிய அவர், ஆன்மிகமும் பக்தி உணர்வும் நிறைந்த இந்த மண்ணில், கோயிலுக்குச் செல்லாதவர்களுக்கும், நெற்றியில் திலகம் இடுவதைத் தவறு என நினைப்பவர்களுக்கும் மக்கள் வாக்களிக்கக் கூடாது என்று தெரிவித்தார். அனைத்து மதங்களையும் சமமாகப் போற்றுபவர்களுக்கே மக்கள் தங்கள் ஆதரவை வழங்க வேண்டும் என்றும் அவர் வலியுறுத்தினார்.

தமிழகத்தில் தற்போதைய ஆட்சியில் சட்டம் ஒழுங்கு சீர்குலைந்துள்ளதாகவும், பெண்களுக்குப் பாதுகாப்பு இல்லாத சூழல் நிலவுவதாகவும் அவர் குற்றம் சாட்டினார். கொலை, கொள்ளை மற்றும் போதைப்பொருள் கடத்தல் போன்ற சமூக விரோதச் செயல்களைக் கட்டுப்படுத்த அரசு தவறிவிட்டது என்று சாடிய அவர், மத்திய அரசை எதிரியாகக் கருதுவதாலேயே தமிழகத்தின் வளர்ச்சி பாதிக்கப்பட்டுள்ளதாகத் தெரிவித்தார். திமுக அரசு கடந்த தேர்தலில் அளித்த வாக்குறுதிகளை நிறைவேற்றத் தவறிவிட்டதாகவும் அவர் பேசினார்.

மத்தியில் பிரதமர் மோடி தலைமையிலான அரசுடன் இணைந்து செயல்படும் ஒரு ஆட்சி தமிழகத்தில் அமைந்தால் மட்டுமே மாநிலம் உண்மையான வளர்ச்சியை எட்டும் என்று வாசன் குறிப்பிட்டார். மறைந்த முதல்வர் ஜெயலலிதா கொண்டு வந்த பெண்கள் நலத் திட்டங்களை எடப்பாடி பழனிசாமி சிறப்பாகத் தொடர்ந்ததை சுட்டிக்காட்டிய அவர், தமிழகத்தின் முன்னேற்றத்திற்காக அஇஅதிமுக மற்றும் பாஜக கூட்டணியை மக்கள் வெற்றி பெறச் செய்ய வேண்டும் என்று கேட்டுக்கொண்டார்.