கோடைக்காலம் தொடங்கிவிட்டாலே சருமப் பராமரிப்பில் காட்டும் அக்கறையை நாம் கூந்தல் பராமரிப்பில் காட்டுவதில்லை. சூரியனிடமிருந்து வெளிப்படும் கடுமையான புற ஊதா (UV) கதிர்கள் சருமத்தைப் பாதிப்பது போலவே, உங்கள் கூந்தலையும் மோசமாகப் பாதிக்கும். இதனால் கூந்தல் வறட்சி, நுனி பிளவு மற்றும் முடி உதிர்தல் போன்ற பிரச்சனைகள் ஏற்படுகின்றன. இந்தக் கோடையில் உங்கள் கூந்தலை ஆரோக்கியமாகவும் பளபளப்பாகவும் வைத்திருக்க பின்பற்ற வேண்டிய முக்கியமான வழிமுறைகள் இங்கே கொடுக்கப்பட்டுள்ளன.

நேரடி சூரிய ஒளியைத் தவிர்க்கவும்

வெயிலில் வெளியே செல்லும்போது சூரியக் கதிர்கள் நேரடியாகக் கூந்தலில் படுவதைத் தவிர்க்க வேண்டும். இது கூந்தலின் ஈரப்பதத்தை உறிஞ்சி அதனை உயிரற்றதாக மாற்றிவிடும். வெளியே செல்லும்போது ஸ்கார்ஃப் அல்லது தொப்பியைப் பயன்படுத்துவது சிறந்தது. இது உங்கள் கூந்தலை மட்டுமல்லாமல் சருமத்தையும் சேர்த்தே பாதுகாக்கும்.

பாதுகாப்பு அடுக்கை உருவாக்குதல்

கூந்தலுக்கு ஒரு பாதுகாப்பு அடுக்கை உருவாக்குவது அவசியம். தேங்காய் எண்ணெய் அல்லது பாதாம் எண்ணெய் தடவுவது கூந்தலுக்கு நல்லது என்றாலும், அது கூந்தலை ஒட்டினாற்போல் மாற்றக்கூடும். எனவே, SPF கொண்ட ஹேர் சீரம் அல்லது ஹேர் ஸ்ப்ரே பயன்படுத்துவது சிறந்தது. இது சூரியக் கதிர்களிடமிருந்து கூந்தலைப் பாதுகாக்கும் கேடயமாகச் செயல்படும்.

ஆழமான கண்டிஷனிங் (Deep Conditioning)

வெப்பத்தினால் ஏற்படும் வறட்சியைப் போக்க 15 முதல் 20 நாட்களுக்கு ஒருமுறை வீட்டிலேயே ‘ஹேர் ஸ்பா’ செய்யலாம். இதற்கு ஸ்பா க்ரீமை கூந்தலில் தடவி, பின் சுடுநீரில் நனைத்த துண்டை தலையில் சுற்றி ஆவி பிடிக்க வேண்டும். இது கூந்தலுக்குத் தேவையான ஈரப்பதத்தை அளித்து மென்மையாக்கும்.

வெப்பக் கருவிகளைத் தவிர்த்தல்

கோடையில் ஏற்கனவே வளிமண்டல வெப்பம் அதிகமாக இருப்பதால், கூந்தலுக்குப் பயன்படுத்தும் ஹேர் ட்ரையர், ஸ்ட்ரெய்ட்னர் அல்லது கர்லிங் மெஷின் போன்ற வெப்பக் கருவிகளின் பயன்பாட்டைக் குறைக்க வேண்டும். இவற்றைத் தொடர்ந்து பயன்படுத்துவது கூந்தலை எளிதில் உடையச் செய்யும்.

வாரமொருமுறை எண்ணெய் மசாஜ்

பலர் கோடையில் எண்ணெய் தேய்ப்பதைத் தவிர்க்கிறார்கள். ஆனால், கூந்தலுக்குத் தேவையான ஊட்டம் கிடைக்க வாரம் ஒருமுறை ஷாம்பூ போடுவதற்கு ஒரு மணி நேரத்திற்கு முன்னதாக எண்ணெய் தேய்த்து மென்மையாக மசாஜ் செய்ய வேண்டும். இது கூந்தலுக்குப் போதிய ஈரப்பதத்தையும் ஊட்டச்சத்தையும் வழங்கும்.

ஒரு பார்வையில்

• வெயிலில் செல்லும்போது ஸ்கார்ஃப் அல்லது தொப்பி அணிந்து கூந்தலை மூடவும்.
• கூந்தலுக்கு SPF கொண்ட சீரம் அல்லது பாதுகாப்பு ஸ்ப்ரே பயன்படுத்தவும்.
• 15 நாட்களுக்கு ஒருமுறை வீட்டிலேயே ஹேர் ஸ்பா அல்லது டீப் கண்டிஷனிங் செய்யவும்.
• ட்ரையர் போன்ற வெப்பம் தரும் கருவிகளைப் பயன்படுத்துவதை தவிர்க்கவும்.
• வாரம் ஒருமுறை தவறாமல் எண்ணெய் மசாஜ் செய்து கூந்தலை ஊட்டமாக வைத்திருக்கவும்.