2025-26 மதிப்பீட்டு ஆண்டிற்கான திருத்தப்பட்ட மற்றும் தாமதமான வருமான வரித் தாக்கல் செய்வதற்கான காலக்கெடு டிசம்பர் 31-டன் முடிவடைந்தது. உரிய நேரத்திற்குள் அசல் வருமான வரித் தாக்கல் செய்தவர்களுக்கு, திருத்தப்பட்ட படிவத்திற்கான தேதியைத் தவறவிட்டாலும் நியாயமான ரீஃபண்ட் தொகை ரத்து செய்யப்படாது. வருமான வரித் துறை உங்கள் தரவுகளைச் சரிபார்த்த பிறகு, ரீஃபண்ட் தொகையை நேரடியாக வங்கிக் கணக்கிற்கு அனுப்பி வைக்கும். ஆனால், இதுவரை ஒருமுறை கூட வரித் தாக்கல் செய்யாதவர்களுக்கு ரீஃபண்ட் பெறுவதில் பெரும் சிக்கல் ஏற்படும்.

காலக்கெடு முடிந்த பிறகு ‘மேம்படுத்தப்பட்ட வருமானம்’ (ITR-U) தாக்கல் செய்ய வாய்ப்பு இருந்தாலும், அதன் மூலம் ரீஃபண்ட் கோர முடியாது. இது கூடுதல் வருமானத்தை அறிவிக்க அல்லது பிழைகளைத் திருத்தி கூடுதல் வரி செலுத்த மட்டுமே பயன்படுத்தப்படுகிறது. எனவே, வரித் தாக்கல் செய்யும் அனைத்து வாய்ப்புகளையும் தவறவிட்டவர்கள், ரீஃபண்ட் பெறும் உரிமையை இழக்க நேரிடும். பொதுவாக, சரிபார்ப்பு முடிந்த சில வாரங்கள் முதல் சில மாதங்களுக்குள் ரீஃபண்ட் தொகை கணக்கில் வரவு வைக்கப்படும்.