காதுகளுக்குள் மணி அடிப்பது போன்றோ அல்லது சீட்டி அடிப்பது போன்றோ வினோதமான சத்தம் கேட்பதை மருத்துவ ரீதியாக ‘டினிடஸ்’ (Tinnitus) என்று அழைக்கிறார்கள். இது ஒரு சாதாரண பிரச்சனை அல்ல, உடலில் மறைந்திருக்கும் ஏதோ ஒரு தீவிர நோயின் அறிகுறியாக இருக்கலாம் என்று ஃபோர்டிஸ் மருத்துவமனையின் காது மூக்கு தொண்டை நிபுணர் டாக்டர் அவினாஷ் குமார் எச்சரிக்கிறார். காதுகளில் அழுக்கு சேர்வது, முதுமை காரணமாக நரம்புகள் பலவீனமடைவது அல்லது நீண்ட நேரம் ஹெட்ஃபோன்களில் அதிக சத்தத்துடன் பாடல்களைக் கேட்பது போன்றவை இதற்கு முக்கிய காரணமாகின்றன. மேலும் உயர் இரத்த அழுத்தம் மற்றும் நீரிழிவு போன்ற நோய்களும் காது நரம்புகளை நேரடியாகப் பாதிக்கும்.

இதிலிருந்து தற்காத்துக் கொள்ள ஹெட்ஃபோன்களைப் பயன்படுத்தும் போது ஒலியின் அளவை 60 சதவீதத்திற்கும் குறைவாக வைத்திருக்க வேண்டும். காதுகளை சுத்தம் செய்ய கூர்மையான பொருட்கள் அல்லது இயர்பட்ஸ்கள் பயன்படுத்துவதை தவிர்க்க வேண்டும், ஏனெனில் இது செவித்திறனைப் பாதிக்கக்கூடும். மன அழுத்தம் மற்றும் இரத்த அழுத்தத்தைக் கட்டுக்குள் வைத்திருப்பது இந்த சத்தத்தைக் குறைக்க உதவும். இதுபோன்ற ஒலிகள் தொடர்ந்து கேட்டால் அதை அலட்சியப்படுத்தாமல் உடனடியாக மருத்துவரை அணுகுவது செவித்திறன் இழப்பைத் தடுக்க உதவும் என்று நிபுணர்கள் அறிவுறுத்துகின்றனர்.