பாதுகாப்பு அமைச்சர் ராஜ்நாத் சிங் தலைமையில், 2025-ம் ஆண்டு இந்திய பாதுகாப்புப் படையில் மிகப்பெரிய சீர்திருத்தங்கள் மேற்கொள்ளப்பட்டுள்ளன. பாதுகாப்பு கையகப்படுத்தும் கவுன்சில் ஜனவரி முதல் 3.84 லட்சம் கோடி ரூபாய்க்கும் அதிகமான கொள்முதல் திட்டங்களுக்கு ஒப்புதல் அளித்துள்ளது. டிசம்பர் 2025 இறுதிக்குள், நவீனமயமாக்கல் பட்ஜெட்டில் 80 சதவீத நிதி செலவிடப்பட்டு, 1.82 லட்சம் கோடி ரூபாய் மதிப்பிலான புதிய ஒப்பந்தங்கள் கையெழுத்தாகியுள்ளன. இந்த நடவடிக்கைகள் மூலம் ஆயுதப் படைகளை நவீனப்படுத்தவும், உள்நாட்டு உற்பத்தியை ஊக்குவிக்கவும் மத்திய அரசு முன்னுரிமை அளித்துள்ளது.

தனியார் துறை மற்றும் சிறு குறு தொழில்துறையினரை பாதுகாப்பு உற்பத்தியில் ஈடுபடுத்தி ‘தற்சார்பு இந்தியா’ திட்டம் வலுப்படுத்தப்பட்டுள்ளது. முன்னாள் ராணுவத்தினருக்காக ‘ஈ-செஹத்’ தொலைமருத்துவ சேவை மற்றும் 70 வயதுக்கு மேற்பட்டவர்களுக்கு வீடு தேடி வரும் மருந்து விநியோகத் திட்டம் தொடங்கப்பட்டுள்ளது. மேலும், 31.69 லட்சம் ஓய்வூதியதாரர்கள் ‘ஸ்பார்ஷ்’ போர்ட்டலில் இணைக்கப்பட்டு டிஜிட்டல் முறைப்படுத்தப்பட்டுள்ளனர். இந்த சீர்திருத்தங்கள் 2047-ம் ஆண்டிற்குள் இந்தியாவை உலகத்தரம் வாய்ந்த பாதுகாப்பு சக்தியாக மாற்றும் தொலைநோக்குப் பார்வையை பிரதிபலிக்கின்றன.