டி20 உலகக்கோப்பை தொடரில் இந்தியாவுக்கு எதிரான போட்டியில் பங்கேற்கப் போவதில்லை என்ற முந்தைய முடிவை பாகிஸ்தான் தற்போது மாற்றிக்கொண்டுள்ளது. கொழும்பில் உள்ள ஆர்.பிரேமதாசா மைதானத்தில் வரும் பிப்ரவரி 15-ஆம் தேதி திட்டமிட்டபடி இந்தியா – பாகிஸ்தான் இடையிலான ஹை-வோல்டேஜ் போட்டி நடைபெறவுள்ளது.

பாகிஸ்தானின் முடிவுக்கு காரணம் என்ன?

பாகிஸ்தான் பிரதமர் ஷேபாஸ் ஷெரீப் தலைமையில் நடைபெற்ற உயர்மட்ட ஆலோசனைக் கூட்டத்திற்குப் பிறகு இந்த முக்கிய முடிவு எடுக்கப்பட்டுள்ளது. இலங்கை கிரிக்கெட் வாரியத் தலைவர் ஷம்மி சில்வா, ஐக்கிய அரபு அமீரகம் மற்றும் வங்கதேச கிரிக்கெட் வாரியங்களின் கோரிக்கையை ஏற்று, பாகிஸ்தான் தனது நிலைப்பாட்டை மாற்றிக்கொண்டதாகத் தெரிகிறது.

போட்டி விவரங்கள்:

• நாள்: பிப்ரவரி 15, 2026
• நேரம்: இந்திய நேரப்படி இரவு 7:00 மணி
• இடம்: ஆர்.பிரேமதாசா மைதானம், கொழும்பு
• குரூப் ‘ஏ’: இந்தியா, பாகிஸ்தான், அமெரிக்கா, நமீபியா மற்றும் நெதர்லாந்து.

வங்கதேசத்தின் நிலை என்ன?

மறுபுறம், பாதுகாப்பு காரணங்களைச் சுட்டிக்காட்டி 2026 டி20 உலகக்கோப்பையில் இருந்து வங்கதேசம் விலகியது கவலையளிப்பதாக ஐசிசி (ICC) தெரிவித்துள்ளது. இருப்பினும், வங்கதேச கிரிக்கெட் வாரியத்தின் (BCB) மீது நிதி ரீதியாகவும் அல்லது நிர்வாக ரீதியாகவும் எந்தவிதமான அபராதமோ, ஒழுங்கு நடவடிக்கைளோ எடுக்கப்பட மாட்டாது என சர்வதேச கிரிக்கெட் கவுன்சில் தெளிவுபடுத்தியுள்ளது.

பாகிஸ்தானின் இந்த அதிரடி மாற்றத்தால், உலகக்கோப்பையின் மிகவும் எதிர்பார்க்கப்படும் இந்தியா-பாகிஸ்தான் மோதல் உறுதியாகியுள்ளது. இது கிரிக்கெட் ரசிகர்களிடையே பெரும் உற்சாகத்தை ஏற்படுத்தியுள்ளது.