ஆப்கானிஸ்தானின் காபூல் மற்றும் காந்தகார் மாகாணங்களில் பாகிஸ்தான் நடத்திய வான்வழித் தாக்குதல்களை இந்தியா வன்மையாகக் கண்டித்துள்ளது. இது ஒரு இறையாண்மை கொண்ட நாட்டின் மீதான ஆக்கிரமிப்பு என்று இந்திய வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் தெரிவித்துள்ளார். ஆப்கானிஸ்தானின் பிராந்திய ஒருமைப்பாட்டிற்கு இந்தியா தனது முழு ஆதரவை உறுதிப்படுத்தியுள்ளதுடன், பொதுமக்களின் உயிரிழப்புகள் குறித்து ஆழ்ந்த கவலையையும் வெளிப்படுத்தியுள்ளது.

இந்தத் தாக்குதலுக்குப் பதிலடியாக ஆப்கானிஸ்தான் படைகள் நடத்திய தாக்குதலில் 14 பாகிஸ்தான் வீரர்கள் கொல்லப்பட்டதாகத் தகவல் வெளியாகியுள்ளது. பாகிஸ்தான் இதனை பயங்கரவாத எதிர்ப்பு நடவடிக்கை என்று கூறினாலும், தலிபான் அரசு அதனை நிராகரித்து கடும் எச்சரிக்கை விடுத்துள்ளது. எல்லைப் பகுதியில் தற்போது போர் பதற்றம் அதிகரித்துள்ளதால் சர்வதேச சமூகம் இந்த விவகாரத்தை உன்னிப்பாகக் கவனித்து வருகிறது.