அமெரிக்காவுடனான புதிய வர்த்தக ஒப்பந்தம் இந்தியாவில் கடும் விவாதத்தை ஏற்படுத்தியுள்ளது. இறக்குமதி வரி குறைப்பைக் கொண்டாடினாலும், ரஷ்ய எண்ணெய் இறக்குமதி மீதான அமெரிக்காவின் நேரடி கண்காணிப்பு இந்தியாவின் இறையாண்மையை பாதிப்பதாக நிபுணர்கள் எச்சரிக்கின்றனர். மாஸ்கோவிடம் இருந்து கச்சா எண்ணெய் வாங்கினால் மீண்டும் வரி விதிக்கப்படும் என்ற அமெரிக்காவின் நிபந்தனை, இந்தியாவின் தன்னாட்சி முடிவெடுக்கும் அதிகாரத்தை கேள்விக்குறியாக்கியுள்ளது.

மத்திய அமைச்சர்களின் முன்னுக்குப் பின் முரணான பதில்கள் மற்றும் எதிர்க்கட்சிகளின் விமர்சனங்கள் அரசின் மீதான அழுத்தத்தை அதிகரித்துள்ளன. இந்தியாவின் 140 கோடி மக்களின் எரிசக்தித் தேவையைப் பூர்த்தி செய்யவே எண்ணெய் இறக்குமதி செய்யப்படுவதாக வெளியுறவு அமைச்சகம் கூறினாலும், அமெரிக்காவின் நிபந்தனைகளை அது நேரடியாக மறுக்கவில்லை. இது வெறும் வர்த்தக ஒப்பந்தம் அல்ல, இந்தியாவின் வெளியுறவுக் கொள்கையில் அமெரிக்காவின் தலையீடு என புவிசார் அரசியல் ஆய்வாளர்கள் கருதுகின்றனர்.