ஆரோக்கியமான வாழ்விற்கும் நீண்ட ஆயுளுக்கும் நாம் மேற்கொள்ளும் உணவுக்கட்டுப்பாடு மற்றும் உடற்பயிற்சிகளை விட மரபணுக்களுக்கே அதிக முக்கியத்துவம் இருப்பதாக புதிய ஆய்வுகள் தெரிவிக்கின்றன. ஒருவரின் ஆயுட்காலத்தை தீர்மானிப்பதில் மரபணுக்களின் (Genes) பங்கு சுமார் 55 சதவீதம் என்று விஞ்ஞானிகள் கண்டறிந்துள்ளனர். முன்னதாக இது வெறும் 10 முதல் 25 சதவீதம் மட்டுமே என்று கருதப்பட்டது. டென்மார்க் மற்றும் ஸ்வீடனில் உள்ள இரட்டையர்களிடம் நடத்தப்பட்ட 100 ஆண்டுகால ஆய்வில், விபத்துக்கள் அல்லது தொற்று நோய்களைத் தவிர்த்து பார்த்தால், மனிதனின் முதுமை மற்றும் ஆயுட்காலம் அவர்களின் டிஎன்ஏ கட்டமைப்பால் பெருமளவு தீர்மானிக்கப்படுவது உறுதி செய்யப்பட்டுள்ளது.

ஆயினும், மரபணு சாதகமாக இருந்தால் மட்டும் நீண்ட காலம் வாழ்ந்துவிட முடியுமா என்ற கேள்விக்கு மருத்துவர்கள் எச்சரிக்கை விடுக்கின்றனர். குறிப்பாக இந்தியாவின் தற்போதைய சூழலில் நிலவும் காற்று மாசுபாடு, உணவு கலப்படம் மற்றும் நீரிழிவு போன்ற பிரச்சனைகள் மரபணுக்களின் நேர்மறையான விளைவுகளைத் தடுத்துவிடும் என்று நிபுணர் டாக்டர் அனுப் மிஸ்ரா கூறுகிறார். மரபணுக்கள் ஒருவரின் வாழ்நாள் எல்லையை நிர்ணயிக்கலாம், ஆனால் அந்த எல்லையை அடைய சரியான வாழ்க்கை முறை மற்றும் ஆரோக்கியமான உணவுப் பழக்கம் மட்டுமே உதவும். சுருக்கமாகச் சொன்னால், நீண்ட ஆயுளுக்கான டிக்கெட்டை மரபணுக்கள் வழங்கினாலும், இலக்கை அடைய ஆரோக்கியமான வாழ்வியலே சிறந்த வாகனமாகும்.