தமிழக சட்டமன்றத் தேர்தலுக்கான வேட்புமனுத் தாக்கல் மார்ச் 30-ஆம் தேதி தொடங்கி ஏப்ரல் 6-ஆம் தேதியுடன் நிறைவடைந்தது. மாநிலம் முழுவதும் மொத்தம் 7,600 வேட்புமனுக்கள் பெறப்பட்டதாகத் தேர்தல் ஆணையம் அறிவித்துள்ளது. இதில் ஆண் வேட்பாளர்களிடமிருந்து 6,217 மனுக்களும், பெண் வேட்பாளர்களிடமிருந்து 1,380 மனுக்களும், திருநங்கைகளிடமிருந்து 3 மனுக்களும் தாக்கல் செய்யப்பட்டுள்ளன. அதிகபட்சமாக கரூர் தொகுதியில் 108 பேர் வேட்புமனு தாக்கல் செய்துள்ளனர் என்பது குறிப்பிடத்தக்கது.

தாக்கல் செய்யப்பட்ட மனுக்கள் மீதான பரிசீலனை செவ்வாய்க்கிழமை நடைபெற்றது. இரவு 11 மணி நிலவரப்படி, பெறப்பட்ட மொத்த மனுக்களில் 4,919 வேட்புமனுக்கள் ஏற்கப்பட்டுள்ளன. பல்வேறு காரணங்களால் 2,366 மனுக்கள் நிராகரிக்கப்பட்ட நிலையில், 11 மனுக்கள் திரும்பப் பெறப்பட்டுள்ளன. தலைநகர் சென்னையில் உள்ள 16 தொகுதிகளில் மட்டும் மொத்தம் 628 மனுக்கள் தாக்கல் செய்யப்பட்டுள்ளன. வில்லிவாக்கம் மற்றும் ராதாபுரம் தொகுதிகளில் திருநங்கைகள் போட்டியிட மனுத் தாக்கல் செய்துள்ளனர்.

தமிழகத்தில் ஏப்ரல் 23-ஆம் தேதி ஒரே கட்டமாக வாக்குப்பதிவு நடைபெறவுள்ளது. தேர்தல் ஆணையத்தின் கால அட்டவணைப்படி, வேட்புமனுக்களைத் திரும்பப் பெற ஏப்ரல் 9-ஆம் தேதி வரை அவகாசம் அளிக்கப்பட்டுள்ளது. அன்றைய தினமே இறுதி வேட்பாளர் பட்டியல் வெளியிடப்பட்டுத் தேர்தல் களம் முழுவீச்சில் சூடுபிடிக்கத் தொடங்கும். மே 4-ஆம் தேதி வாக்கு எண்ணிக்கை நடைபெற்று முடிவுகள் அறிவிக்கப்பட உள்ளன. தற்போதைய நிலவரப்படி தேர்தல் முன்னேற்பாடுகளை ஆணையம் தீவிரப்படுத்தியுள்ளது.