திருச்சியில் நடைபெற்ற அரசு விழாவில் பிரதமர் நரேந்திர மோடி பல ஆயிரம் கோடி மதிப்பிலான புதிய திட்டங்களைத் தொடங்கி வைத்தார். குறிப்பாக அமிர்த பாரத் ரயில்கள் மற்றும் ஈரோடு, நீலகிரி மாவட்டங்களில் 9 லட்சம் குடும்பங்கள் பயன்பெறும் வகையில் குழாய் மூலம் எரிவாயு வழங்கும் திட்டத்திற்கு அவர் அடிக்கல் நாட்டினார். இந்த பசுமைத் திட்டம் 4 கோடி மரங்களை நடுவதற்கு இணையானது என அவர் பெருமிதத்துடன் குறிப்பிட்டார்.

மாமன்னன் ராஜேந்திர சோழன் கட்டிய கங்கைகொண்ட சோழபுரத்தின் சிறப்புகளைப் போற்றிய பிரதமர், அங்கு அமைக்கப்படும் புதிய நெடுஞ்சாலை சுற்றுலாப் பயணிகளின் பாதுகாப்பை உறுதி செய்யும் என்றார். தமிழக மக்களின் உணர்வுகளுக்கு மதிப்பளிக்கும் வகையில், கடந்த வார மதுரை பயணத்தைத் தொடர்ந்து இந்த விழாவிலும் பிரதமர் மோடி இந்திக்கு பதிலாக ஆங்கிலத்தில் உரையாற்றியது அனைவரின் கவனத்தையும் ஈர்த்துள்ளது.