மும்பையில் நடைபெற்ற நிகழ்ச்சி ஒன்றில் சிறுவர்களின் சமூக வலைதளப் பயன்பாடு குறித்து நடிகர் ஆமீர் கான் தனது கவலையை வெளிப்படுத்தியுள்ளார். கர்நாடக அரசின் நடவடிக்கையை ஆதரித்த அவர், டிஜிட்டல் தளங்களின் அல்காரிதம் இன்றைய தலைமுறையின் மனநலத்தை பாதிப்பதாகக் கூறினார். இது ஒரு மாயவலை போல செயல்பட்டு இளைஞர்களின் விலைமதிப்பற்ற நேரத்தை வீணடிப்பதாக அவர் எச்சரித்தார்.

தனது சொந்த அனுபவத்தைப் பகிர்ந்த ஆமீர் கான், ரீல்ஸ் பார்க்கும் பழக்கம் புத்தக வாசிப்பை பாதித்துள்ளதாகக் குறிப்பிட்டார். இதனை ஒரு உளவியல் ரீதியான பொறி என்று அவர் வர்ணித்தார். இந்நிகழ்வில் பங்கேற்ற தேவேந்திர பட்னாவிஸ் இந்த கருத்தை வழிமொழிந்தார். தொழில்நுட்பத்தை எதிர்க்கவில்லை என்றாலும், குழந்தைகளின் மனநலன் கருதி டிஜிட்டல் தளங்களை முறைப்படுத்துவது அவசியம் என்று ஆமீர் வலியுறுத்தினார்.