மத்திய பிரதேச மாநிலம் குணா மாவட்டத்தில் காதல் விவகாரத்தில் சிறுமியும் அவரது காதலனும் விஷம் குடித்து உயிரிழந்த சம்பவம் அதிர்ச்சியை ஏற்படுத்தியுள்ளது. ரஷீத் காலனியைச் சேர்ந்த 25 வயது கணேஷ் மற்றும் 16 வயது சிறுமி ஆகிய இருவரும் கடந்த ஒரு வருடமாக காதலித்து வந்ததாகக் கூறப்படுகிறது. ஞாயிற்றுக்கிழமை மாலை வீட்டில் யாரும் இல்லாத நேரத்தில் இருவரும் விஷம் குடித்த நிலையில், மருத்துவமனையில் சிகிச்சை பலனின்றி சிறுமி முதலில் உயிரிழந்தார்.

காதலியின் மரணச் செய்தியை அறிந்த கணேஷ், மருத்துவமனையிலிருந்து தப்பி ஓடினார். மறுநாள் காலை அவரது உடல் மர்மமான முறையில் மீட்கப்பட்டது. சிறுமியின் குடும்பத்தினர் கணேஷ் தான் விஷம் கொண்டு வந்ததாகக் குற்றம் சாட்டியுள்ளனர். இரு குடும்பத்தினருக்கும் காதல் விவகாரம் தெரிந்திருந்தும் இந்த விபரீத முடிவு ஏன் எடுக்கப்பட்டது என்பது குறித்து காவல்துறையினர் தீவிர விசாரணை நடத்தி வருகின்றனர்.