டெல்லிக்கு அருகிலுள்ள கிரேட்டர் நொய்டாவின் பிஸ்ராக் பகுதியில் குடும்பச் சண்டையினால் கணவன் மற்றும் மனைவி உயிரிழந்த சம்பவம் பெரும் பரபரப்பை ஏற்படுத்தியுள்ளது. ஏட்டாவைச் சேர்ந்த அனில் பாதுகாப்புப் பணியாளராகவும், அவரது மனைவி அனிதா வீட்டு வேலைகளும் செய்து வந்தனர். கடந்த டிசம்பர் 28 அன்று இரவு இவர்களுக்குள் ஏற்பட்ட மோதல் முற்றிய நிலையில், அனில் தனது மனைவியை கத்தியால் குத்திக் கொலை செய்தார்.

மனைவியின் இறப்பிற்குப் பிறகு அதிர்ச்சியடைந்த அனில், அதே அறையில் தூக்கிட்டுத் தற்கொலை செய்து கொண்டார். நீண்ட நேரம் கதவு திறக்கப்படாததால் அக்கம் பக்கத்தினர் அளித்த தகவலின் பேரில் வந்த போலீசார், இருவரது உடல்களையும் மீட்டனர். முதற்கட்ட விசாரணையில் நீண்டகால குடும்பப் பிரச்சனையே இந்த விபரீத முடிவுக்குக் காரணம் எனத் தெரியவந்துள்ளது. போலீசார் வழக்குப்பதிவு செய்து விசாரணை நடத்தி வருகின்றனர்.