2026 டி20 உலகக்கோப்பையில் இந்தியா மற்றும் பாகிஸ்தான் அணிகள் மோதவுள்ள நிலையில், மைதானத்திற்கு வெளியேயான வார்த்தை போர் இப்போதே சூடுபிடிக்கத் தொடங்கிவிட்டது. அமெரிக்காவிற்கு எதிரான போட்டியில் அபாரமாக செயல்பட்ட பாகிஸ்தான் சுழற்பந்து வீச்சாளர் உஸ்மான் தாரிக், இந்திய அணியை வம்பிழுக்கும் வகையில் பேசியிருப்பது கிரிக்கெட் வட்டாரத்தில் பரபரப்பை ஏற்படுத்தியுள்ளது.

அமெரிக்காவிற்கு எதிரான ஆட்டத்தில் 4 ஓவர்களில் 27 ரன்கள் மட்டுமே விட்டுக்கொடுத்து 3 விக்கெட்டுகளை வீழ்த்தி அசத்தினார் உஸ்மான். அவரது வித்தியாசமான பந்துவீச்சு பாணி தற்போது பேசுபொருளாகியுள்ளது.

மிரள வைக்கும் பந்துவீச்சு பாணி

உஸ்மான் தாரிக்கின் பந்துவீச்சு முறை மிகவும் தனித்துவமானது. பந்தை வீசுவதற்கு முன்பு கையை நீண்ட நேரம் நிறுத்தி வைத்து, எதிர்பாராத நேரத்தில் பந்தை விடுவிக்கிறார். இது பேட்டர்களுக்கு கடும் குழப்பத்தை ஏற்படுத்துகிறது. சில வீரர்கள் இவரது பந்துவீச்சு விதிகளை மீறுவதாக புகார் அளித்த போதிலும், லாகூரில் நடந்த சோதனைகளில் அவரது பாணி சரியானது என உறுதி செய்யப்பட்டு, டி20 போட்டிகளில் விளையாட அனுமதி வழங்கப்பட்டுள்ளது.

இந்திய வீரர்களுக்கு அழுத்தம்?

அடுத்ததாக இந்தியாவை எதிர்கொள்வது குறித்து பேசிய உஸ்மான் தாரிக்:

“இந்திய வீரர்கள் எனது பந்துவீச்சை உன்னிப்பாக கவனித்து வருகிறார்கள் என்று நினைக்கிறேன். அவர்கள் எனது ஸ்டைலை பற்றி அதிகம் விவாதிப்பதிலிருந்தே, அவர்கள் அழுத்தத்தில் இருப்பது தெரிகிறது. ஊடகங்கள் என்ன சொல்கின்றன என்பதை பற்றி எனக்கு கவலையில்லை. எனது பயிற்சியில் நான் கற்றதை மைதானத்தில் சரியாக செயல்படுத்தவே விரும்புகிறேன்,” என்றார்.

வரலாற்றுப் பக்கங்கள்

இந்தியா-பாகிஸ்தான் மோதல் குறித்து அவர் கூறுகையில், “பாகிஸ்தான் எப்போது தோற்கத் தொடங்கியது என்பதை மட்டும் பார்க்கக்கூடாது. ஆரம்பத்திலிருந்தே பாகிஸ்தான் ஒரு ஆதிக்கம் செலுத்தும் அணியாகவே இருந்து வருகிறது. எனவே வரலாற்றை கருத்தில் கொண்டு, இந்த உலகக்கோப்பையிலும் நாங்கள் வெற்றிபெற முயற்சிப்போம்,” எனத் தெரிவித்தார்.

சாதனை மற்றும் சவால்

உஸ்மான் தாரிக் தொடர்ந்து 23 டி20 இன்னிங்ஸ்களில் தலா ஒரு விக்கெட்டையாவது வீழ்த்தி சாதனை படைத்துள்ளார். இது ஒரு பாகிஸ்தான் பந்துவீச்சாளரின் மிகச்சிறந்த சாதனையாகும்.

இருப்பினும், புள்ளி விவரங்கள் இந்தியாவிற்கு சாதகமாகவே உள்ளன. டி20 உலகக்கோப்பை வரலாற்றில் இந்தியா 7 முறை பாகிஸ்தானை வீழ்த்தியுள்ளது, பாகிஸ்தான் ஒரே ஒரு முறை (2021) மட்டுமே வென்றுள்ளது. குறிப்பாக, சூர்யகுமார் யாதவ் தலைமையிலான இந்திய அணி பாகிஸ்தானுக்கு எதிராக தொடர்ந்து 5 வெற்றிகளுடன் பலமான நிலையில் இருப்பது குறிப்பிடத்தக்கது.

இந்தியாவுக்கு எதிரான ஆட்டத்தில் உஸ்மான் தாரிக்கின் ‘மர்ம’ பந்துவீச்சு எடுபடுமா அல்லது இந்திய பேட்டர்கள் அவரை துவம்சம் செய்வார்களா என்பதை பொறுத்திருந்துதான் பார்க்க வேண்டும்.