மகாராஷ்டிர முன்னாள் துணை முதல்வர் அஜித் பவார் கடந்த ஜனவரி 28 அன்று விமான விபத்தில் உயிரிழந்த சம்பவம், தற்போது பெரும் பரபரப்பை ஏற்படுத்தியுள்ளது. இந்த விபத்தின் பின்னணியில் மிகப்பெரிய சதி இருக்கலாம் என அவரது மருமகனும், என்சிபி எம்.எல்.ஏ-வுமான ரோஹித் பவார் பகீர் குற்றச்சாட்டுகளை முன்வைத்துள்ளார்.

செவ்வாய்க்கிழமை செய்தியாளர்களைச் சந்தித்த ரோஹித் பவார், விமான இயக்கம் மற்றும் பாதுகாப்பு விதிமுறைகளில் உள்ள குளறுபடிகள் குறித்த ஆதாரங்களை வெளியிட்டார். அவர் எழுப்பியுள்ள முக்கிய கேள்விகள் இதோ:

• திடீர் மாற்றம் ஏன்?: அஜித் பவாரின் பயணத் திட்டம் கடைசி நேரத்தில் சாலை மார்க்கத்திலிருந்து தனியார் சார்ட்டர் விமானத்திற்கு மாற்றப்பட்டது ஏன்?
• பைலட் மாற்றம்: ஏற்கனவே முடிவான முக்கிய பைலட்களுக்குப் பதிலாக, கடைசி நிமிடத்தில் சுமித் கபூர் என்பவரை நியமித்தது ஏன்? அந்த பைலட்டின் தகுதி மற்றும் உடல்நிலை முறையாகப் பரிசோதிக்கப்பட்டதா?
• தொழில்நுட்பக் கோளாறு: விமானம் பறந்து கொண்டிருந்தபோது அதன் டிரான்ஸ்பாண்டர் (Transponder) ஏன் செயல்படவில்லை? விபத்துக்கு முன்னதாக பைலட்டிடமிருந்து எந்த ஒரு அபாய அழைப்பும் (Distress Call) வராதது ஏன்?
• விமானத்தின் தரம்: விபத்துக்குள்ளான விமானத்தின் வயது மற்றும் ‘விஎஸ்ஆர் ஏவியேஷன்’ நிறுவனத்தின் பாதுகாப்பு பதிவுகள் சந்தேகத்திற்குரியதாக உள்ளன.

பின்னணியில் உள்ள உண்மையை வெளிக்கொண்டு வர, சர்வதேச விமான போக்குவரத்து நிபுணர்களைக் கொண்டு வெளிப்படையான விசாரணை நடத்த வேண்டும் என்று ரோஹித் பவார் வலியுறுத்தியுள்ளார்.