మహారాష్ట్రలో ఈసారి నూతన సంవత్సర వేడుకలు అర్ధరాత్రి దాటిన తర్వాత కూడా అంగరంగ వైభవంగా జరగనున్నాయి. డిసెంబర్ 31 రాత్రి హోటళ్లు, రెస్టారెంట్లు, పబ్ లు మరియు బార్లను జనవరి 1వ తేదీ తెల్లవారుజామున 5 గంటల వరకు తెరిచి ఉంచేందుకు రాష్ట్ర ప్రభుత్వం అనుమతించింది. ముఖ్యమంత్రి దేవేంద్ర ఫడ్నవీస్ నేతృత్వంలోని హోం శాఖ ఈ మేరకు శాశ్వత ఉత్తర్వులు జారీ చేసింది. దీనివల్ల ప్రతి ఏటా క్రిస్మస్ మరియు న్యూ ఇయర్ వేడుకల కోసం ప్రత్యేక అనుమతులు తీసుకోవాల్సిన అవసరం ఉండదు.

అయితే ఈ వెసులుబాటు కేవలం ఇండోర్ వేదికలకు మాత్రమే వర్తిస్తుందని ప్రభుత్వం స్పష్టం చేసింది. బహిరంగ ప్రదేశాల్లో వేడుకలకు ఈ అనుమతి వర్తించదు. శబ్ద కాలుష్య నియమాలను కచ్చితంగా పాటించాలని, భద్రతా బాధ్యతలను ఆయా యాజమాన్యాలే చూసుకోవాలని ఆదేశాల్లో పేర్కొన్నారు. శాంతిభద్రతల పరిరక్షణ కోసం రాష్ట్రవ్యాప్తంగా పోలీసులు కట్టుదిట్టమైన భద్రతా ఏర్పాట్లు చేస్తున్నారు.